આજથી વૉર્ન-મુરલીધરન ટ્રોફીનો રોમાંચ શરૂ થશે

ઑસ્ટ્રેલિયાએ ચાર વાર અને શ્રીલંકાએ એક વાર જીતી છે આ ટ્રોફી

વૉર્ન-મુરલીધરન ટ્રોફી સાથે બન્ને ટીમના કૅપ્ટન્સે પારંપરિક અંદાજમાં કરાવ્યું ફોટોશૂટ.

ઑસ્ટ્રેલિયા અને શ્રીલંકા વચ્ચે આજથી બે મૅચની ટેસ્ટ-સિરીઝ શરૂ થઈ રહી છે. વર્લ્ડ ટેસ્ટ ચૅમ્પિયનશિપ (WTC)ની વર્તમાન સીઝનની આ અંતિમ ઔપચારિક ટેસ્ટ-સિરીઝ છે. જૂન ૨૦૨૫માં સાઉથ આફ્રિકા સામેની ફાઇનલ મૅચ પહેલાં ઑસ્ટ્રેલિયા માટે ઇન્ટરનૅશનલ સ્તર પર તૈયારી કરવા આ છેલ્લી બે ટેસ્ટ-મૅચ છે. ભારતમાં સવારે ૧૦ વાગ્યાથી સોની સ્પોર્ટ્સની ચૅનલ પર આ ટેસ્ટ-સિરીઝનો આનંદ માણી શકાશે.

વર્ષ ૨૦૦૭થી આ બન્ને દેશ વચ્ચે રમાતી ટેસ્ટ-સિરીઝ વૉર્ન-મુરલીધરન ટ્રોફીના નામથી રમાય છે. એનું નામ ઑસ્ટ્રેલિયાના મહાન સ્પિનર શેન વૉર્ન અને શ્રીલંકાના મહાન સ્પિનર મુથૈયા મુરલીધરનના સન્માનમાં રાખવામાં આવ્યું હતું. ૨૦૦૭થી ઑસ્ટ્રેલિયા ચાર વાર આ ટ્રોફી જીત્યું છે, જ્યારે ૨૦૧૬માં શ્રીલંકા એક વાર જીત્યું છે અને ૨૦૨૨માં આ સિરીઝ ડ્રૉ રહી હતી. મહેમાન ટીમ ઑસ્ટ્રેલિયાના કૅપ્ટન સ્ટીવ સ્મિથે ગઈ કાલે જાહેરાત કરી હતી કે સ્ટાર બૅટર ટ્રૅવિસ હેડ અનુભવી ઓપનર ઉસ્માન ખ્વાજા સાથે ઓપનિંગ કરવા ઊતરશે.

ટેસ્ટનો હેડ-ટુ હ-ડ રેકૉર્ડ
કુલ મૅચ	૩૩
ઑસ્ટ્રેલિયાની જીત	૨૦
શ્રીલંકાની જીત	૫
ડ્રૉ	૦૮