25 April, 2026 04:03 PM IST | Mumbai | Gujarati Mid-day Correspondent
એક IPL સીઝનમાં પહેલી વખત વાનખેડે સ્ટેડિયમમાં હારની હૅટ-ટ્રિક થઈ મુંબઈની
વાનખેડે સ્ટેડિયમમાં ગુરુવારે ચેન્નઈ સુપર કિંગ્સ સામે મુંબઈ ઇન્ડિયન્સના જુસ્સાનો ધબડકો જોવા મળ્યો હતો. ચેન્નઈએ ૬ વિકેટ ગુમાવીને આપેલા ૨૦૮ રનના ટાર્ગેટ સામે મુંબઈ ૧૯ ઓવરમાં ૧૦૪ રને ઑલઆઉટ થયું હતુ. ચેન્નઈ સામેની ૪૦ મૅચોના ઇતિહાસમાં મુંબઈએ હમણાં સુધી કરેલો આ સૌથી ઓછો સ્કોર હતો. અગાઉ મુંબઈએ ૨૦૨૧માં ચેન્નઈ સામે ૧૩૬-૮ રન કર્યા હતા.
૨૦૨૩થી મુંબઈ સામે ચેન્નઈની ૬ મૅચમાં આ પાંચમી જીત છે. મુંબઈને છેલ્લે આ કટ્ટર હરીફ સામે ૨૦૨૫માં જીત મળી હતી.
૧૦૩ રનની જીત એ ચેન્નઈ માટે IPLમાં સૌથી મોટી જીત હતી. અગાઉ તેઓ ૨૦૧૫માં કિંગ્સ ઇલેવન પંજાબની ટીમ સામે ૯૭ રને મોટી જીત નોંધાવી શક્યા હતા. રનના મામલે મુંબઈની IPLમાં આ ૧૦૩ રનની સૌથી મોટી હાર હતી. ૨૦૧૩માં તેઓ રાજસ્થાન રૉયલ્સ સામે ૮૭ રને હાર્યા હતા.
મુંબઈ ઇન્ડિયન્સે હોમગ્રાઉન્ડમાં પોતાની હમણાં સુધીની સૌથી મોટી હાર નોંધાવી છે. અગાઉ તેઓ આ સ્ટેડિયમમાં ૨૦૧૫માં રૉયલ ચૅલેન્જર્સ બેન્ગલુરુ સામે ૩૯ રને હાર્યા હતા. આ પહેલી IPL સીઝન છે જેમાં મુંબઈને વાનખેડે સ્ટેડિયમમાં હૅટ-ટ્રિક હાર મળી છે. ૨૦૧૭ અને ૨૦૧૮ની સીઝન વચ્ચે તેઓ લાગલગાટ ચાર હારનો સામનો આ મેદાન પર કરી ચૂક્યા છે.
વાનખેડે સ્ટેડિયમમાં મુંબઈ આ સીઝનમાં કલકત્તા સામે પહેલી મૅચ ૬ વિકેટે જીત્યું હતું. જોકે ત્યાર બાદ બૅન્ગલોર સામે ૧૮ રન, પંજાબ સામે ૭ વિકેટ અને ચેન્નઈ સામે ૧૦૩ રનથી સતત હારનો સામનો કરવો પડ્યો છે.
