ભૂતપૂર્વ ભારતીય કૅપ્ટન સૌરવ ગાંગુલી પહેલી વખત કોઈ ટીમનો હેડ કોચ બન્યો

સૌરવ ગાંગુલી

ભારતના ભૂતપૂર્વ કૅપ્ટન સૌરવ ગાંગુલીને ૨૦૨૬ની સીઝન પહેલાં સાઉથ આફ્રિકા SA20 ટીમ પ્રિટોરિયા કૅપિટલ્સના હેડ કોચ તરીકે નિયુક્ત કરવામાં આવ્યો છે. હેડ કોચ તરીકે આ તેનો પહેલો કાર્યકાળ બનશે. BCCIના ભૂતપૂર્વ પ્રમુખ ગાંગુલીને ઇંગ્લૅન્ડના ભૂતપૂર્વ બૅટ્સમૅન જોનાથન ટ્રૉટના રાજીનામા બાદ આ પદની જવાબદારી મળી છે.

પ્રિટોરિયા કૅપિટલ્સ ટુર્નામેન્ટની પહેલી સીઝનની રનર-અપ ટીમ છે, પરંતુ છેલ્લી બન્ને સીઝનમાં એ છ ટીમ વચ્ચે પાંચમા સ્થાને રહી છે. પ્રિટોરિયા કૅપિટલ્સની માલિકી JSW સ્પોર્ટ્સની છે જે દિલ્હી કૅપિટલ્સની સહ-માલિક છે. ગાંગુલી વર્ષ ૨૦૧૮ અને ૨૦૧૯ની વચ્ચે IPL ટીમ દિલ્હી કૅપિટલ્સનો ટીમ-ડિરેક્ટર હતો. BCCI પ્રમુખ બન્યા પછી તેણે આ પદ છોડ્યું હતું.