01 July, 2026 03:56 PM IST | Mumbai | Gujarati Mid-day Correspondent
વસીમ જાફર
મુંબઈના ૪૮ વર્ષના વસીમ જાફરને હૈદરાબાદ ટીમના મેન્ટર તરીકે નિયુક્ત કરવામાં આવ્યો છે. ફર્સ્ટ ક્લાસ ક્રિકેટમાં સૌથી વધુ રન કરનાર ભારતીય એવો વસીમ જાફર આગામી બે વર્ષ સુધી આ પદ સંભાળશે.
અહેવાલ અનુસાર વસીમ જાફરની નિમણૂક અંબાતી રાયુડુના કહેવા પર કરવામાં આવી છે. અંબાતી રાયુડુ હાલમાં જ હૈદરાબાદ ક્રિકેટ અસોસિએશનનો ક્રિકેટ ડિરેક્ટર બન્યો છે. બે વખતનું રણજી ટ્રોફી ચૅમ્પિયન (૧૯૩૭-’૩૮ અને ૧૯૮૬-’૮૭) હૈદરાબાદ તાજેતરના વર્ષોમાં ડોમેસ્ટિક ક્રિકેટમાં ખાસ પ્રભાવ પાડવામાં નિષ્ફળ રહ્યું છે.
ભારત માટે ૩૧ ટેસ્ટ-મૅચ અને બે વન-ડે રમી ચૂકેલો વસીમ જાફર ડોમેસ્ટિક કોચિંગ સર્કિટમાં અનુભવી છે. તેણે અગાઉ ઉત્તરાખંડનું કોચિંગ કર્યું હતું અને ગઈ સીઝનમાં તે વિદર્ભ બૅટિંગ સલાહકાર હતો. તેણે બંગલાદેશ ક્રિકેટ ટીમ અને IPLમાં પંજાબ કિંગ્સ સાથે પણ કામ કર્યું છે.
