19 September, 2026 06:45 PM IST | Mumbai | Gujarati Mid-day Correspondent
ગૌતમ ગંભીર અને સંજુ સૅમસન
અફઘાનિસ્તાન સામેની ક્લીન સ્વીપ પછી ભારતીય હેડ કોચ ગૌતમ ગંભીરે પ્રેસ-કૉન્ફરન્સમાં મહત્ત્વપૂર્ણ નિવેદન આપ્યાં હતાં. ગૌતમ ગંભીરે કહ્યું, ‘ડ્રેસિંગ રૂમમાં માત્ર એવી ચર્ચા થાય છે કે બૅટ અને બૉલથી આપણે કેવા પ્રકારની અસર ઊભી કરી શકીએ છીએ. છેલ્લાં બે વર્ષથી આ જ અમારી માનસિકતા અને વિચારધારા રહી છે. ઇંગ્લૅન્ડ ટૂર દરમ્યાન સંજુ સૅમસનને ડ્રૉપ કરવો એ મારા કોચિંગ કાર્યકાળનો સૌથી મુશ્કેલ નિર્ણય હતો. કારણ કે એ પહેલાં તેણે અસાધારણ પ્રદર્શન કર્યું હતું, પરંતુ કેટલીક વાર તમારે ખેલાડીના વર્તમાન ફૉર્મને ધ્યાનમાં લેવું પડે છે.’
વૈભવ સૂર્યવંશીને ન રમાડવા વિશે શું કહ્યું?
૧૫ વર્ષના વૈભવ સૂર્યવંશીને ભારતીય સિનિયર ટીમની જર્સીમાં ભારતની ધરતી પર પહેલી વખત રમવાની તક આ સિરીઝમાં મળી નહોતી. ગૌતમ ગંભીર કહે છે, ‘તેની પાસે ટૅલન્ટ છે, પરંતુ તેણે પોતાની તકની રાહ જોવી પડશે. જે ખેલાડી છેલ્લાં બે-ત્રણ વર્ષથી સારું પ્રદર્શન કરી રહ્યો હોય તે સ્વાભાવિક રીતે જ ટીમમાં હમણાં જ આવેલા ખેલાડી કરતાં આગળ રહેશે. જ્યારે તેને રમવાની તક મળશે ત્યારે તેને લાંબા સમય સુધી રમવાની તક પણ મળશે. ભારતીય ક્રિકેટમાં આવું જ હોય છે. આપણે ડ્રેસિંગ રૂમમાં સ્પર્ધા અને પ્રતિભા ઇચ્છીએ છીએ. ક્રિકેટમાં વસ્તુઓ આ રીતે જ ચાલતી હોય છે. ભલે તમારી ઉંમર ૧૫ વર્ષની, હોય કે ૩૦ વર્ષની તમારે તકની રાહ જોવી પડશે.’
