08 November, 2026 08:18 AM IST | Wellington | Gujarati Mid-day Correspondent
પ્લેયર ઑફ ધ મૅચ ગુરનૂર બરાડ
ન્યુ ઝીલૅન્ડના સીમ-ફ્રેન્ડ્લી વાતાવરણ અને બાઉન્સી પિચોનો પૂરેપૂરો ફાયદો ઉઠાવીને ભારતીય ફાસ્ટ બોલર ગુરનૂર બરાડે શનિવારે બીજી વન-ડે મૅચમાં ૪ વિકેટ ઝડપીને ભારતની રોમાંચક જીતમાં મહત્ત્વની ભૂમિકા ભજવી હતી.
ગુરનૂરે માત્ર ૩૦ રન આપીને ૪ વિકેટ ઝડપી હતી. ડકવર્થ-લુઇસ-સ્ટર્ન મેથડ (DLS)થી ભારતે મેળવેલા ૪ રનના વિજયમાં તે પ્લેયર ઑફ ધ મૅચ જાહેર થયો હતો. આ અગાઉ પહેલી વન-ડેમાં પણ તેણે ૪૪ રન આપીને ૩ વિકેટ લીધી હતી.
બીજી વન-ડે પૂરી થયા બાદ પોસ્ટ-મૅચ પ્રેઝન્ટેશનમાં પોતાના પ્રદર્શન અને પ્લાન વિશે વાત કરતાં ૬ ફુટ પાંચ ઇંચની હાઇટ ધરાવતા આ ફાસ્ટ બોલરે જણાવ્યું હતું કે ‘મેં આ બોલિંગને ખરેખર ખૂબ એન્જૉય કરી છે. ન્યુ ઝીલૅન્ડમાં બોલિંગ કરતી વખતે અહીં મળતો બાઉન્સ અને પેસ મારા માટે ઘણા મદદરૂપ સાબિત થયા હતા.’
