16 September, 2026 06:35 PM IST | New Delhi | Gujarati Mid-day Online Correspondent
સંજુ સૅમસન, ઇશાન કિશન અને અભિષેક શર્મા
ICCએ બુધવારે નવા T20 આંતરરાષ્ટ્રીય રૅન્કિંગ જાહેર કરી છે. ભારતનો અભિષેક શર્મા બૅટિંગ રૅન્કિંગમાં એક સ્થાન ઉપર ચઢીને બીજા ક્રમે પહોંચ્યો છે, જ્યારે ભારતીય વિકેટકીપર-બૅટર ઈશાન કિશને પ્રથમ સ્થાન જાળવી રાખ્યું છે. ભારતે અફઘાનિસ્તાન સામેની ત્રણ મૅચની સિરીઝમાં 2-0ની અજેય લીડ મેળવી લીધી છે.
અભિષેક શર્માએ સિરીઝની પ્રથમ મૅચમાં 82 રનની ઝડપી ઇનિંગ્સ રમી હતી. પરિણામે, તેઓ પાકિસ્તાનના સાહિબઝાદા ફરહાનને પાછળ છોડીને રૅન્કિંગમાં એક સ્થાન ઉપર આવ્યા છે. અભિષેક હવે ઈશાન કિશન કરતાં 51 રેટિંગ પોઈન્ટ પાછળ છે. ભારતના સંજુ સૅમસનને પણ રૅન્કિંગમાં ફાયદો થયો છે; અફઘાનિસ્તાન સામેની બીજી મૅચમાં અડધી સદી ફટકાર્યા બાદ, તે ચાર સ્થાન ઉપર ચઢીને 30મા ક્રમે પહોંચ્યો છે.
ભારતીય ખેલાડીઓએ T20 બૉલિંગ રૅન્કિંગમાં પણ પોતાનું સ્થાન સુધાર્યું છે. વરુણ ચક્રવર્તી બે સ્થાન ઉપર ચઢીને પાંચમા ક્રમે પહોંચ્યો છે, જ્યારે જસપ્રીત બુમરાહ સાત સ્થાનની છલાંગ લગાવીને 10મા ક્રમે પહોંચ્યો છે. અર્શદીપ સિંહ 11 સ્થાનના આગળ વધી 14મા ક્રમે પહોંચ્યો છે અને અક્ષર પટેલ છ સ્થાન ઉપર ચઢીને 27મા ક્રમે પહોંચ્યો છે. અફઘાનિસ્તાનના ઓલરાઉન્ડર અઝમતુલ્લાહ ઓમરઝાઈના T20 ઓલરાઉન્ડર રૅન્કિંગમાં પણ સુધારો જોવા મળ્યો છે; તેણે સિરીઝની શરૂઆતની મૅચમાં અણનમ અડધી સદી ફટકારી હતી.
પ્રથમ ODIમાં ઝિમ્બાબ્વે સામે ઑસ્ટ્રેલિયાની 59 રનની જીત બાદ, તેમના ત્રણ ખેલાડીઓના રૅન્કિંગમાં સુધારો થયો છે. ઑસ્ટ્રેલિયન ઝડપી બૉલર નૅથન ઍલિસ 20 સ્થાન ઉપર ચઢીને 20મા ક્રમે પહોંચ્યો; તેણે મૅચમાં પાંચ વિકેટ ઝડપી હતી. મૅથ્યુ રૅનશોએ 109 રનની ઇનિંગ્સ રમી અને `પ્લેયર ઓફ ધ મૅચ` બન્યો, સાથે જ તે ટૉપ 100ની બહારથી સીધા 68મા ક્રમે પહોંચ્યો. કૂપર કૉનોલી નવ સ્થાન ઉપર ચઢીને 77મા ક્રમે પહોંચ્યો; તેણે ઝિમ્બાબ્વે સામે ત્રીજા ક્રમે બૅટિંગ કરતા 51 રન બનાવ્યા હતા.
ટૅસ્ટ રૅન્કિંગમાં, ઇંગ્લૅન્ડના ઝડપી બૉલર ઓલી રૉબિન્સન બે સ્થાન ઉપર ચઢીને ત્રીજા ક્રમે પહોંચ્યો છે. પાકિસ્તાન સામેની ત્રણ મૅચની સિરીઝ દરમિયાન તેણે 21 વિકેટ ઝડપી હતી. આ તેની કારકિર્દીનું સર્વશ્રેષ્ઠ રેટિંગ પણ છે. ઇંગ્લૅન્ડના જૉશ ટંગ પણ બે સ્થાનના સુધારા સાથે 11 મા ક્રમે પહોંચ્યો છે; તેણે સિરીઝમાં 19 વિકેટ લીધી હતી. રૉબિન્સને બર્મિંગહામ ખાતેની ત્રીજી ટૅસ્ટમાં અડધી સદી પણ ફટકારી હતી, જેનાથી ટૅસ્ટ ઓલ-રાઉન્ડર રૅન્કિંગમાં તે સાત સ્થાનના ઉછાળા સાથે 13 મા ક્રમે પહોંચ્યો છે. પાકિસ્તાનનો સિરીઝમાં ૦-૩થી પરાજય થયો હોવા છતાં, કેપ્ટન બાબર આઝમ ટૅસ્ટ બેટિંગ રૅન્કિંગમાં બે સ્થાન ઉપર ચઢીને ૧૩મા ક્રમે પહોંચ્યો છે. શાન મસૂદ ચાર સ્થાનના સુધારા સાથે ૩૭મા ક્રમે પહોંચ્યો છે. ઈંગ્લેન્ડના વિકેટકીપર-બેટર જેમી સ્મિથ પણ ત્રણ સ્થાનના સુધારા સાથે ૨૦મા ક્રમે પહોંચ્યો છે.
