10 November, 2026 10:59 PM IST | New Zealand | Gujarati Mid-day Correspondent
કેટ-ફૅન્સ માટે બૅટ પર ઑટોગ્રાફ આપતો જસપ્રીત બુમરાહ.
ન્યુ ઝીલૅન્ડ અને ભારતની A ટીમો વચ્ચેની ત્રીજી ચાર-દિવસીય મૅચના ત્રીજા દિવસે કોઈ રમત શક્ય ન બની, એના કારણે સિરીઝ ડ્રૉ થવાની શક્યતા છે. આ ત્રણ મૅચની સિરીઝની પહેલી બન્ને મૅચ પણ ડ્રૉ રહી છે.
લિંકનમાં ગઈ કાલે ભારે વરસાદ અને ભીના આઉટફીલ્ડને કારણે એક પણ બૉલની રમત રમાઈ નહોતી. પહેલા બે દિવસની રમતમાં પહેલી ઇનિંગ્સમાં ભારતે ૪૬૪-૫નો અને ન્યુ ઝીલૅન્ડે ૩૬-૨નો સ્કોર કર્યો હતો. ભારત પાસે ૪૨૮ રનની વિશાળ લીડ બાકી છે.
રમતના અભાવે ભારતીય ટીમ-મૅનેજમેન્ટ નિરાશ થયું હતું, કારણ કે એ ઇચ્છતું હતું કે સિનિયર ટીમોની ટેસ્ટ-સિરીઝ પહેલાં જસપ્રીત બુમરાહ, રવીન્દ્ર જાડેજા જેવા બોલર્સને લય પકડવાની તક મળે. ન્યુ ઝીલૅન્ડની બૅટિંગ દરમ્યાન ભારતીય બોલર્સ ૧૪ ઓવર જ ફેંકી શક્યા છે.
