15 May, 2026 02:55 PM IST | Mumbai | Gujarati Mid-day Correspondent
ચેન્નઈનો કૅપ્ટન ઋતુરાજ ગાયકવાડ, લખનઉનો કૅપ્ટન રિષભ પંત
IPL 2026ની ૫૯મી મૅચ આજે એકાના સ્ટેડિયમમાં હોમ-ટીમ લખનઉ સુપર જાયન્ટ્સ અને ચેન્નઈ સુપર કિંગ્સ વચ્ચે રમાશે. ૬ દિવસની અંદર સતત બીજી વખત બન્ને ટીમ સામસામે ટકરાશે. બન્ને ટીમે છેલ્લી મૅચ એકબીજા સામે ૧૦ મેના રોજ ચેપૉક સ્ટેડિયમમાં રમી હતી. આ મૅચમાં ચેન્નઈએ ૨૦૪ રનનો ટાર્ગેટ ચેઝ કરીને પાંચ વિકેટે જીત નોંધાવી હતી.
૧૧ મૅચમાં ૩ જીત અને ૮ હાર સાથે રિષભ પંત ઍન્ડ કંપની સૌથી તળિયાની ટીમ છે. બાકીની ત્રણ મૅચમાં શાનદાર પ્રદર્શન કરીને લખનઉની ટીમ પ્લેઑફનાં સમીકરણો રસપ્રદ બનાવવાનો અને પોતાને પૉઇન્ટ-ટેબલમાં દસમા ક્રમથી ઉપર લાવવાનો પ્રયાસ કરશે. સતત ત્રણ જીત મેળવનાર ઋતુરાજ ગાયકવાડની ટીમ ૧૨ પૉઇન્ટ સાથે ટેબલમાં પાંચમા ક્રમે છે. ૧૧ મૅચમાંથી ૬ જીત અને પાંચ હારનો સામનો કરનાર ચેન્નઈએ પ્લેઑફની દાવેદારી મજબૂત કરવા બાકીની ત્રણેય મૅચ જીતવી પડશે.
|
બન્ને ટીમનો હેડ-ટુ-હેડ રેકૉર્ડ |
|
|
મૅચ |
૭ |
|
ચેન્નઈની જીત |
૩ |
|
લખનઉની જીત |
૩ |
|
નો-રિઝલ્ટ |
૧ |
એકાના સ્ટેડિયમમાં ચેન્નઈએ પોતાની ત્રણેય મૅચ લખનઉ સામે રમી છે. એમાંથી ૨૦૨૩ની મૅચ નો-રિઝલ્ટ રહી હતી. ૨૦૨૪માં લખનઉ અને ૨૦૨૫માં ચેન્નઈને અહીં જીત મળી હતી. લખનઉ પોતાના હોમગ્રાઉન્ડ પર રમેલી પચીસ મૅચમાંથી ૧૦ જીત અને ૧૫ હારનો સામનો કરી ચૂક્યું છે. લખનઉએ આ સીઝનમાં પાંચ હોમ-મૅચમાંથી પહેલી ચારેય મૅચ હાર્યા બાદ છેલ્લી મૅચમાં બૅન્ગલોર સામે પહેલી જીત મેળવી હતી.
મૅચનો સમય સાંજે ૭.૩૦ વાગ્યાથી
