24 June, 2026 11:58 AM IST | Mumbai | Gujarati Mid-day Correspondent
કુલદીપ યાદવ, રિષભ પંત
લખનઉ સુપર જાયન્ટ્સ અને દિલ્હી કૅપિટલ્સની અનુમાનિત ડીલ ગઈ કાલે IPL 2027 માટે પહેલી સૌથી મોટી ટ્રેડ-ડીલ તરીકે કન્ફર્મ થઈ હતી. લખનઉ સુપર જાયન્ટ્સના કૅપ્ટન તરીકે બે સીઝન રમનાર રિષભ પંત ફરી પાછો દિલ્હી કૅપિટલ્સમાં સામેલ થયો છે. ઉત્તર પ્રદેશનો સ્પિનર કુલદીપ યાદવ હવે લખનઉ સુપર જાયન્ટ્સ માટે રમશે.
રિષભ પંતે પોતાની પહેલી અને જૂની ટીમમાં સામેલ થવા માટે સૅલેરી ૨૭ કરોડથી ઘટાડીને ૧૫ કરોડ રૂપિયા કરી દીધી છે. લખનઉના કૅપ્ટન તરીકે છેલ્લી બે સીઝનમાં તેણે ૨૬૯ રન અને ૩૧૨ રન કર્યા હતા. ટીમ પૉઇન્ટ્સ ટેબલમાં સાતમા અને દસમા સ્થાને રહી હતી. ૨૦૧૬થી ૨૦૨૪ વચ્ચે દિલ્હી કૅપિટલ્સ માટે ૮ સીઝન રમનાર રિષભ પંતે આ ટીમ માટે સૌથી વધુ ૧૧૧ મૅચમાં સૌથી વધુ ૩૨૮૪ રન કર્યા હતા. તે ટીમનો કૅપ્ટન પણ રહી ચૂક્યો છે.
૨૦૧૬થી ૨૦૨૧ વચ્ચે પાંચ સીઝન કોલકાતા નાઇટ રાઇડર્સ અને ૨૦૨૨થી પાંચ સીઝન દિલ્હી કૅપિટલ્સ માટે રમનાર સ્પિનર કુલદીપ યાદવ હવે ત્રીજી ટીમ લખનઉ સુપર જાયન્ટ્સ માટે રમશે. તે પોતાની ૧૩.૨૫ કરોડ રૂપિયાની વર્તમાન સૅલેરી સાથે જ નવી ટીમમાં ગયો છે. તેણે દિલ્હી માટે ૬૫ મૅચમાં ૭૨ વિકેટ લીધી હતી.
