03 October, 2022 12:30 PM IST | New Delhi | Gujarati Mid-day Correspondent
સરફરાઝ ખાન
રાજકોટમાં ૨૦૧૯-’૨૦ના રણજી ચૅમ્પિયન સૌરાષ્ટ્ર અને રેસ્ટ ઑફ ઇન્ડિયા વચ્ચે રમાતી પાંચ દિવસની ઈરાની ટ્રોફીની મૅચમાં ગઈ કાલે બીજા દિવસે પણ યજમાન સૌરાષ્ટ્રની ટીમ મુસીબતમાં આવી ગઈ હતી. પ્રથમ દાવમાં આ સ્પર્ધાના ફિફ્ટ-લોએસ્ટ ૯૮ રનના સ્કોર પર ઑલઆઉટ થઈ ગયા બાદ રેસ્ટ ઑફ ઇન્ડિયાએ ૩૭૪ રન બનાવીને ૨૭૬ રનની તોતિંગ સરસાઈ લીધી અને ત્યાર પછી સૌરાષ્ટ્રએ બીજા દાવમાં ૩૮ રનમાં પહેલી બન્ને વિકેટ (હાર્વિક દેસાઈ, સ્નેલ પટેલ) ગુમાવી દીધી હતી. રેસ્ટના લેફ્ટ આર્મ સ્પિનર સૌરભ કુમારે બે વિકેટ લીધી હતી. ગઈ કાલે સવારે રેસ્ટનો સરફરાઝ ખાન (૧૩૮ રન, ૧૭૮ બૉલ, બે સિક્સર, વીસ ફોર) શનિવારની અધૂરી રહેલી ઇનિંગ્સમાં ફક્ત ૧૩ રન ઉમેરી શક્યો હતો. સૌરાષ્ટ્રના પેસ બોલર ચેતન સાકરિયાએ પાંચ વિકેટ લીધી હતી.