IPL 2026ની શરૂઆત ગુમાવશે ઇન્જર્ડ જૉશ હેઝલવુડ અને પૅટ કમિન્સ

બૅન્ગલોર માટે રમતો જૉશ હેઝલવુડ એડીની ઇન્જરીથી અને હૈદરાબાદનો કૅપ્ટન પૅટ કમિન્સ હજી પીઠની ઇન્જરીમાંથી સંપૂર્ણપણે ફિટ છે કે નહીં એનું ક્લિયરન્સ ક્રિકેટ ઑસ્ટ્રેલિયાના મેડિકલ સ્ટાફ તરફથી મળ્યું નથી.

પૅટ કમિન્સ અને જૉશ હેઝલવુડ

ઑલમોસ્ટ ૧૦  દિવસની અંદર IPL 2026નો રોમાંચ શરૂ થવાનો છે. જોકે નવી સીઝન પહેલાં સનરાઇઝર્સ હૈદરાબાદ અને રૉયલ ચૅલેન્જર્સ બેન્ગલુરુની ટીમ ચિંતામાં મુકાઈ છે. ઑસ્ટ્રેલિયન સ્પીડસ્ટાર જૉશ હેઝલવુડ અને પૅટ કમિન્સ ઇન્જરીમાંથી હજી સંપૂર્ણપણે ફિટ થયા ન હોવાથી IPL 2026ની શરૂઆતની કેટલીક મૅચ તેઓ ગુમાવી શકે છે.  ૨૮ માર્ચે એમ. ચિન્નાસ્વામી સ્ટેડિયમમાં હૈદરાબાદ અને બૅન્ગલોરની ટક્કરથી IPL 2026નો શુભારંભ થવાનો છે. ઓપનિંગ મૅચ પહેલાં એ બન્ને ઑસ્ટ્રેલિયન ફાસ્ટ બોલર્સ ફિટ થાય એવી કોઈ શક્યતા નથી. બૅન્ગલોર માટે રમતો જૉશ હેઝલવુડ એડીની ઇન્જરીથી અને હૈદરાબાદનો કૅપ્ટન પૅટ કમિન્સ હજી પીઠની ઇન્જરીમાંથી સંપૂર્ણપણે ફિટ છે કે નહીં એનું ક્લિયરન્સ ક્રિકેટ ઑસ્ટ્રેલિયાના મેડિકલ સ્ટાફ તરફથી મળ્યું નથી. બન્નેએ એ પહેલાં ઇન્જરીને કારણે T20 વર્લ્ડ કપ 2026માંથી બહાર રહેવું પડ્યું હતું.

હૈદરાબાદના કૅપ્ટન બનવાની રેસમાં છે ઈશાન કિશન અને અભિષેક શર્મા

સનરાઇઝર્સ હૈદરાબાદની આગેવાની છેલ્લી બે સીઝનથી ઑસ્ટ્રેલિયન કૅપ્ટન પૅટ કમિન્સ લઈ રહ્યો છે. જોકે વર્તમાન સીઝનની શરૂઆતની મૅચોમાં તેની ગેરહાજરીથી નવો કૅપ્ટન શોધવાની ફરજ પડશે. અહેવાલ અનુસાર ભારતીય ટીમના ટૉપ-ઑર્ડર બૅટર્સ ઈશાન કિશન અને અભિષેક શર્મા કૅપ્ટન બનવાની રેસમાં સૌથી આગળ છે. ડોમેસ્ટિક ક્રિકેટમાં ઈશાન કિશન ઝારખંડ માટે કૅપ્ટન અને અભિષેક શર્મા પંજાબ માટે વાઇસ-કૅપ્ટનની ભૂમિકા ભજવી ચૂક્યો છે.