18 August, 2026 10:42 AM IST | Mumbai | Gujarati Mid-day Correspondent
ચૅમ્પિયન બન્યા બાદ ટ્રોફી સાથે ટીમના માલિક સંજીવ ગોયનકા પત્ની સાથે, કૅપ્ટન જૉસ બટલર, ટિમ સાઇફર્ટ તેમજ ટીમ મૂડી, જસ્ટીન લૅન્ગર અને કૅન વિલિયમસન.
ઇંગ્લૅન્ડની ૧૦૦ બૉલની ટુર્નામેન્ટ ધ હન્ડ્રેડની ત્રીજી સીઝન સંજય ગોયનકાની ટીમ મૅન્ચેસ્ટર સુપર જાયન્ટ્સે જીતી લીધી છે. રવિવારે રાત્રે લૉર્ડ્સમાં રમાયેલી રોમાંચક ફાઇનલમાં આ સીઝનની નંબર વન ટીમ ટ્રેન્ટ રૉકૅટ્સને બે બૉલ બાકી રાખીને પાંચ વિકેટથી પરાજિત કરી દીધી હતી.
ટૉસ હાર્યા બાદ પ્રથમ બૅટિંગ કરતા ટ્રેન્ટ રૉકૅટ્સે ૧૦૦ બૉલમાં ૮ વિકેટે ૧૫૮ રન બનાવ્યા હતાં. જૉસ બટલરના નેતૃત્વમાં અને ન્યુ ઝીલૅન્ડના ઓપનર ટિમ સાઇફર્ટની ૩૮ બૉલમાં ૭ સિક્સર અને ૪ ફોરની ધમાકેદાર ઇનિંગ્સના જોરે સુપર જાયન્ટ્સે ૯૮ બૉલમાં પાંચ વિકેટ ગુમાવીને વિજય મેળવી લીધો હતો. સાઇફર્ટ ફાઇનલનો મૅન ઑફ ધ મૅચ ઉપરાંત આ સીઝનમાં પ્લેયર ઑફ ધ ટુર્નામેન્ટ બનીને છવાઈ ગયો હતો.
IPLની ફ્રૅન્ચાઇઝીઓ મુંબઈ ઇન્ડિયન્સ, સનરાઇઝર્સ હૈદરાબાદ અને લખનઉ સુપર જાયન્ટ્સે આ સીઝનમાં ધ હન્ડ્રેડની ટીમો ખરીદી હતી. પહેલી જ સીઝનમાં સુપર જાયન્ટ્સની ટીમ વિજેતા બની હતી, જ્યારે સનરાઇઝર્સની ટીમ એલિમિનેટરમાં હારીને ત્રીજા સ્થાને રહી હતી, મુંબઈ ઇન્ડિયન્સની ટીમ ચોથા ક્રમાંકે રહી હતી.
IPLમાં ૭ અને સાઉથ આફ્રિકન લીગમાં ૪ સીઝન સુધી સંઘર્ષ કર્યા છતાં સફળતા માટે તરસનાર સુપર જાયટ્ન્સ ફ્રૅન્ચાઇઝીના માલિક સંજીવ ગોયનકાને આખરે ટ્રોફી હાથ લાગતાં ખૂબ જ ખુશ થયા હતા અને સોશ્યલ મીડિયામાં એક ભાવુક મેસેજ પોસ્ટ કર્યો હતો.
પુરુષોમાં હારનાર ટ્રેન્ટ રૉકેટ્સની ટીમ જોકે મહિલાઓમાં ચૅમ્પિયન બની હતી. તેમણે વનસાઇડેડ ફાઇનલમાં સનરાઇઝર્સ ફ્રૅન્ચાઇઝીની ટીમ સનરાઇઝર્સ લીડ્સને ૮ વિકેટથી પરાજિત કરી હતી. સનરાઇઝર્સ વતી રમનાર દીપ્તિ શર્માએ ફાઇનલમાં ૧૬ બૉલમાં ૧૨ રન બનાવ્યા હતા અને બોલિંગ નહોતી કરી.
