30 November, 2021 11:25 AM IST | New Delhi | Gujarati Mid-day Correspondent
ઓમ કાનાબાર
આગામી અન્ડર-19 ટ્રાય-સિરીઝ માટેની ઇન્ડિયા ‘બી’ ટીમમાં સૌરાષ્ટ્રના લોહાણા સમાજના બોલર ઓમ કાનાબારનો સમાવેશ કરાયો છે. તેને ઈજાગ્રસ્ત વાસુ વત્સના સ્થાને પસંદ કરાયો છે. જોકે કાનાબારની સાથે બંગાળના રવિકુમારને પણ ટીમમાં સ્થાન મળ્યું છે. અનીશ્વર ગૌતમ આ ટીમનો કૅપ્ટન છે.
ભારતીય ટીમનો હેડ-કોચ રાહુલ દ્રવિડ અન્યોથી કંઈક અલગ અને અનોખું કરવામાં માને છે. તેણે કાનપુરના ગ્રીન પાર્ક સ્ટેડિયમના મેદાનની સ્પોર્ટિંગ પિચ તૈયાર કરવા બદલ ગઈ કાલે આ ગ્રાઉન્ડના માળીઓને ૩૫,૦૦૦ રૂપિયાનું રોકડ ઇનામ આપ્યું હતું. જે વિકેટ પર મોટા ગજાના બૅટર્સ સારું રમવામાં નિષ્ફળ ગયા એ જ વિકેટ પર ન્યુ ઝીલૅન્ડના રાચિન રવીન્દ્ર અને એજાઝ પટેલે નબળા પ્રકાશ વચ્ચે અને ખરાબ થતી જતી પિચ પર જબરદસ્ત સમજદારી અને ધૈર્યપૂર્વક બૅટિંગ કરીને ભારતને વિજયથી વંચિત રાખ્યું હતું અને થ્રિલિંગ ડ્રૉનું પરિણામ નિશ્ચિત બનાવ્યું હતું.
બંગલા દેશના ચટગાંવમાં ચાલતી પ્રથમ ટેસ્ટમાં ગઈ કાલે ચોથા દિવસે ૨૦૨ રનના ટાર્ગેટ સામે વિનાવિકેટે ૧૦૯ રન બનાવી લીધા હતા અને આજે એને જીતવા માટે બીજા ૯૩ રનની જરૂર હતી. આબિદ અલી ૫૬ રને અને અબદુલ્લા શફીક ૫૩ રને રમી રહ્યા હતા. એ પહેલાં બંગલા દેશનો બીજો દાવ ૧૫૭ રનમાં સમેટાઈ ગયો હતો. શાહીન શાહ આફ્રિદીએ પાંચ, સાજિદ ખાને ત્રણ અને હસન અલીએ બે વિકેટ લીધી હતી. પહેલા દાવમાં બંગલા દેશના ૩૩૦ રન સામે પાકિસ્તાને ૨૮૬ રન બનાવ્યા હતા.
ગૉલમાં ગઈ કાલે શરૂ થયેલી વેસ્ટ ઇન્ડીઝ સામેની પ્રથમ ટેસ્ટમાં વરસાદના વિઘ્ન વચ્ચે જેટલી રમત થઈ શકી હતી એમાં યજમાન શ્રીલંકાએ એક વિકેટના ભોગે ૧૧૩ રન બનાવ્યા હતા. પથુમ નિસાન્કા ૬૧ રને રમી રહ્યો હતો. દિમુથ કરુણારત્ને ૪૨ રન બનાવીને આઉટ થયો હતો.
મહિલા ફુટબૉલમાં ૫૭મી રૅન્ક ધરાવતી ભારતીય ટીમ તાજેતરમાં ચાર દેશો વચ્ચેની ટુર્નામેન્ટમાં સાતમા નંબરની બ્રાઝિલની ટીમને લડત આપ્યા બાદ એની સામે હારી ત્યાર પછી ગઈ કાલે ૫૭મા ક્રમની ચિલીની ટીમને પણ ભારતીય ટીમે હારતાં પહેલાં ખૂબ સંઘર્ષ કરાવ્યો હતો. ભારતનો ૦-૩થી પરાજય થયો હતો, પણ એમાં ચિલીની ટીમ વતી પ્રથમ ગોલ ૧૪મી મિનિટે થયા બાદ ૭૦ મિનિટ સુધી ભારતીય ખેલાડીઓએ ચિલીની પ્લેયરોને હંફાવી હતી અને છેક ૮૪ તથા ૮૫મી મિનિટે થયેલા ગોલની મદદથી ચિલીએ ૩-૦થી વિજય મેળવ્યો હતો. ભારતની પ્લેયરોએ ગોલ કરવાની અનેક તક ગુમાવી હતી. હવે ભારતીય ટીમ ગુરુવારે વેનેઝુએલા સામે રમશે.