બુમરાહ પણ માણસ છે અને તેનો ખરાબ દિવસ પણ આવી શકે છે, આશા છે કે તેની સામે અમારો દિવસ સારો રહેશે : ગ્લેન ફિલિપ્સ

ન્યુ ઝીલૅન્ડના સ્ટાર બૅટ્સમૅન અને ધુરંધર ફીલ્ડર ગ્લેન ફિલિપ્સે ભારતના મુખ્ય પેસ બોલર જસપ્રીત બુમરાહ વિશે મોટું નિવેદન આપ્યું છે. તેણે કહ્યું હતું કે ‘જસપ્રીત બુમરાહ એક વર્લ્ડ-ક્લાસ બોલર છે. બુમરાહ એક શાનદાર બોલર છે. તેની પાસે ઘણી બધી વિવિધતાઓ છે. તે ડેથ ઓવરોમાં શાનદાર બોલિંગ કરે છે.’ 

ગ્લેન ફિલિપ્સે વધુમાં કહ્યું હતું કે ‘જસપ્રીત બુમરાહ પણ માણસ છે. બાકીના લોકોની જેમ તેનો પણ ખરાબ દિવસ આવી શકે છે. એથી આશા છે કે અમારો તેની સામે સારો દિવસ રહેશે. ભારતમાંથી જે પ્રતિભા બહાર આવે છે એ જબરદસ્ત છે. આટલી ઓછી વસ્તી ધરાવતા દેશમાંથી આવતા હોવા છતાં ભારત જેવી વિશ્વની મોટી ટીમ સાથે સ્પર્ધા કરવી અમારા માટે ખૂબ સારી વાત છે.’ 

ન્યુ ઝીલૅન્ડ કરતાં ૪૦ લાખ વધુ વસ્તી ધરાવે છે અમદાવાદ

મેન્સ T20 વર્લ્ડ કપ 2026ની ફાઇનલ મૅચનું યજમાન ૯૦ લાખની વસ્તી ધરાવે છે જે આખા ન્યુ ઝીલૅન્ડ દેશની વસ્તી કરતાં ૪૦ લાખ વધારે છે. ન્યુ ઝીલૅન્ડમાં આશરે ૫૩.૬ લાખ લોકો રહે છે.