મોહમ્મદ શમીને ટેસ્ટ-ક્રિકેટમાં ફરી તક ન મળી એને લીધે ભડક્યો રવિ શાસ્ત્રી

કહ્યું કે દેશ માટે આટલું શાનદાર પ્રદર્શન કરનાર ખેલાડીને આ રીતે જવું પડે છે એ દુઃખદ બાબત છે.

રવિ શાસ્ત્રી

ભારતીય ક્રિકેટ ટીમના ભૂતપૂર્વ હેડ કોચ રવિ શાસ્ત્રીએ મોહમ્મદ શમીને ટેસ્ટ-ટીમમાં વધુ એક તક ન આપવાના સિલેક્ટર્સના નિર્ણય સામે આકરા સવાલો ઉઠાવ્યા છે. તેણે સ્પષ્ટ જણાવ્યું હતું કે આ અનુભવી ફાસ્ટ બોલરે ઘરેલુ ક્રિકેટમાં બંગાળ તરફથી સતત રમીને અને લાંબી ઓવરો ફેંકીને પોતાની મૅચ-ફિટનેસ પુરવાર કરી બતાવી હતી.

સિલેક્ટર્સના વલણ સામે આકરા પ્રહારો કરતાં રવિ શાસ્ત્રીએ ઉમેર્યું હતું કે ‘તેની ફિટનેસ સારી ન હોવાના તમામ અહેવાલો મેં સાંભળ્યા છે, પણ તે બંગાળ માટે દરેક મૅચ રમી રહ્યો હતો અને ૧૫થી ૨૦ ઓવર બોલિંગ કરતો હતો. પોતાની ફિટનેસ સાબિત કરવા માટે હવે એક ખેલાડી પાસે તમે બીજું શું માગો છો? દેશ માટે આટલું શાનદાર પ્રદર્શન કરનાર ખેલાડીએ આ રીતે જવું પડે એ દુઃખદ બાબત છે. મને પૂરો વિશ્વાસ હતો કે તેનામાં હજી ટેસ્ટ-ક્રિકેટમાં ૩૦થી ૪૦ વિકેટ ઝડપવાની તાકાત બાકી હતી.’