12 April, 2026 09:59 AM IST | Mumbai | Gujarati Mid-day Correspondent
લખનઉની ટીમના માલિક અને બિઝનેસમૅન સંજીવ ગોયનકા અને મુકુલ ચૌધરી
લખનઉ સુપર જાયન્ટ્સના નવા યંગ સ્ટાર બૅટર મુકુલ ચૌધરી વિશે મહત્ત્વપૂર્ણ અહેવાલ મળી રહ્યા છે. અહેવાલો અનુસાર લખનઉની ટીમના માલિક અને બિઝનેસમૅન સંજીવ ગોયનકા ૨૧ વર્ષના મુકુલ ચૌધરીના પ્રદર્શનથી ખુશ થઈને તેને ખાસ ગિફ્ટ આપવાના છે. મળતા અહેવાલો અનુસાર તેને મર્સિડીઝ-બેન્ઝ મેબૅક GLS ભેટમાં મળી શકે છે. આ કારની કિંમત ૪.૧૦ કરોડ રૂપિયા છે. મુકુલ ચૌધરીએ સંજીવ ગોયનકા વિશે એક પૉડકાસ્ટમાં કહ્યું હતું કે ‘સરના દાદા-પરદાદા રાજસ્થાનના ઝુંઝુનુના જ રહેવાસી હતા. તેમણે મને પહેલી જ મુલાકાતમાં મને ફુલ સપોર્ટ આપવાની વાત કહી હતી. એ મારા માટે સૌથી મોટું મોટિવેશન હતું.’ સંજીવ ગોયનકાની ફૅમિલી મારવાડી સમુદાયની છે. ઘણા મારવાડી વ્યાવસાયિક પરિવારોની જેમ બ્રિટિશ કાળ દરમ્યાન તેમનો પરિવાર રાજસ્થાનથી કલકત્તા શિફ્ટ થયો હતો.
મુકુલ ચૌધરી ૨૦૨૦થી જયપુરની એક ક્રિકેટ-ઍકૅડેમીમાં ટ્રેઇનિંગ લઈ રહ્યો છે. આ ઍકૅડેમીના કોચિંગ-સ્ટાફે ખુલાસો કર્યો છે કે ‘તે દરરોજ ૧૦૦-૧૫૦ સિક્સર મારે છે. IPL સીઝન પહેલાં તેણે ઍકૅડેમીની એક મૅચમાં ૨૦ સિક્સર ફટકારી હતી. તે એક શાનદાર વિકેટકીપર પણ છે. તેની દિનચર્યા ખૂબ જ કડક છે, તે દરરોજ ૪૦૦-૫૦૦ કૅચ લે છે. દરેક દિવસે કીપિંગ પર કામ કરીને પોતાની ફિટનેસ જાળવી રાખે છે. વ્યસ્ત શેડ્યુલ દરમ્યાન પણ તે પોતાના વ્યક્તિગત ટ્રેઇનિંગ-સેશન માટે સમય કાઢે છે.’
