MLC સીઝનની અધવચ્ચે હેડ કોચ અને કૅપ્ટને પદ છોડતાં જ સીએટલ ઓર્કાસ ટીમને મળી પહેલી જીત

MI ન્યુ યૉર્ક સામેની મૅચ પહેલાં આ ટીમના હેડ કોચ મૅથ્યુ મૉટ અને કૅપ્ટન હેન્રિક ક્લાસેન પદ પરથી હટતાં જ એણે સીઝનની પહેલી જીત નોંધાવી હતી

મૅથ્યુ મૉટ, હેન્રિક ક્લાસેન, સિકંદર રઝા

અમેરિકાની મેજર લીગ ક્રિકેટ (MLC) 2025માં સીએટલ ઓર્કાસ ટીમ સાથે એક અનોખી ઘટના ઘટી છે. શનિવારે MI ન્યુ યૉર્ક સામેની મૅચ પહેલાં આ ટીમના હેડ કોચ મૅથ્યુ મૉટ અને કૅપ્ટન હેન્રિક ક્લાસેન પદ પરથી હટતાં જ એણે સીઝનની પહેલી જીત નોંધાવી હતી. કોચિંગ અને મૅનેજમેન્ટ વ્યૂહરચનામાં તફાવતને કારણે ૫૧ વર્ષના મૅથ્યુ મૉટને પદ પરથી હટાવવામાં આવ્યો હતો.

મૅથ્યુ મૉટના સ્થાને આ પદ કોણ સંભાળશે એની જાહેરાત હજી કરવામાં આવી નથી. જ્યારે ઇન્ટરનૅશનલ ક્રિકેટમાંથી નિવૃત્તિ લેનાર હેન્રિક ક્લાસેને સતત પાંચ હારને કારણે જાતે જ કૅપ્ટન્સી છોડી દીધી હતી. તેના સ્થાને ઝિમ્બાબ્વેના ઑલરાઉન્ડર સિકંદર રઝાને કૅપ્ટન જાહેર કરવામાં આવ્યો હતો.