આઠમી વાર પ્લેયર ઑફ ધ મૅચ બનીને શફાલી વર્માએ સ્મૃતિ, જેમિમા અને દીપ્તિને પાછળ છોડી

શફાલી વર્માને ૬૯ રન બનાવવા બદલ પ્લેયર ઑફ ધ મૅચનો અવૉર્ડ આપવામાં આવ્યો હતો

શફાલી વર્મા

મંગળવારે વિશાખાપટનમમાં બીજી T20માં પણ ભારતીય મહિલા ટીમે દબદબો જાળવી રાખતાં ૭ વિકેટે શાનદાર જીત મેળવીને પાંચ મૅચની સિરીઝમાં ૨-૦ની લીડ લઈ લીધી હતી. ભારતીય સ્પિનરો ઉપરાંત ઓપનર શફાલી વર્માના શાનદાર પર્ફોર્મન્સે આ મૅચ ૪૯ બૉલ બાકી રાખીને આસાનીથી જીતી લીધી હતી. ૩૪ બૉલમાં એક સિક્સર અને ૧૧ ફોર સાથે આક્રમક અણમન ૬૯ રન બનાવનાર શફાલી પ્લેયર ઑફ ધ મૅચ જાહેર થઈ હતી.

શફાલીનો ૯૨મી T20 ઇન્ટરનૅશનલ મૅચમાં આ આઠમો પ્લેયર ઑફ ધ મૅચ અવૉર્ડ હતો. આ સાથે તેણે ભારતીયોમાં આ મામલે ધુરંધરો સ્મૃતિ માન્ધના, દીપ્તિ શર્મા અને જેમિમા રૉડ્રિગ્સને પાછળ છોડીને ત્રીજા નંબરે પહોંચી ગઈ છે. આ ત્રણેય ખેલાડીઓ અત્યાર સુધી ૭-૭ વખત પ્લેયર ઑફ ધ મૅચ બની છે. ૧૨ અવૉર્ડ સાથે મિથાલી રાજ ટૉપમાં અને ૧૧ અવૉર્ડ સાથે કૅપ્ટન હરમનપ્રીત કૌર બીજા સ્થાને છે.

T20 ઇન્ટરનૅશનલમાં સૌથી વધુ વાર પ્લેયર આૅફ ધ મૅચ બનનાર ભારતીય ખેલાડીઓ
ખેલાડી	મૅચ	રન	વિકેટ	અવૉર્ડ
મિથાલી રાજ	૮૯	૨૩૬૪	૦	૧૨
હરમનપ્રીત કૌર	૧૮૪	૩૬૭૯	૩૨	૧૧
શફાલી વર્મા	૯૨	૨૨૯૯	૧૦	૮
જેમિમા રૉડ્રિગ્સ	૧૧૪	૨૪૭૦	૧	૭
સ્મૃતિ માન્ધના	૧૫૫	૪૦૨૧	૦	૭
દીપ્તિ શર્મા	૧૩૦	૧૧૦૦	૧૪૮	૭