WPLની ફાઇનલમાં ફિફ્ટી ફટકારનાર અને પ્લેયર ઑફ ધ મૅચ અવૉર્ડ જીતનાર પહેલવહેલી કૅપ્ટન બની હરમનપ્રીત કૌર

હરમનપ્રીત કૌર ૧૫૦ના સ્ટ્રાઇક-રેટથી નવ ચોગ્ગા અને બે છગ્ગાની મદદથી ૪૪ બૉલમાં ૬૬ રનની ધમાકેદાર ઇનિંગ્સ રમી હતી.

હરમનપ્રીત કૌર

WPL 2025માં દિલ્હી કૅપિટલ્સને આઠ રને હરાવીને મુંબઈ ઇન્ડિયન્સ બીજી વાર ચૅમ્પિયન બન્યું છે. મુંબઈ ટાર્ગેટ ડિફેન્ડ કરીને આ ટુર્નામેન્ટની ફાઇનલ જીતનારી પહેલી ટીમ બની છે.  ૧૪૯ રનનો ફાઇનલ મૅચનો હાઇએસ્ટ સ્કોરનો રેકૉર્ડ પણ એના નામે થયો છે. આખી સીઝનના પ્રદર્શનના આધારે આપવામાં આવતા નવમાંથી પાંચ અવૉર્ડ મુંબઈની ટીમે જ જીત્યા હતા.

હરમનપ્રીત કૌર ૧૫૦ના સ્ટ્રાઇક-રેટથી નવ ચોગ્ગા અને બે છગ્ગાની મદદથી ૪૪ બૉલમાં ૬૬ રનની ધમાકેદાર ઇનિંગ્સ રમી હતી. WPLની ફાઇનલમાં રમાયેલી આ સૌથી મોટી વ્યક્તિગત ઇનિંગ્સ હતી. આ પ્રદર્શન બદલ તે ફાઇનલમાં પ્લેયર ઑફ ધ મૅચ અવૉર્ડ જીતી હતી. તેણે ફાઇનલ મૅચમાં કૅપ્ટન તરીકે ફિફ્ટી ફટકારનાર અને પ્લેયર ઑફ ધ મૅચ જીતવાની સિદ્ધિ મેળવી હતી.

WPL 2025ના અવૉર્ડ
મોસ્ટ વૅલ્યુએબલ પ્લેયર : નૅટ સાયવર-બ્રન્ટ (૫૨૩ રન, ૧૨ વિકેટ) (મુંબઈ)
ઑરેન્જ કૅપ : નૅટ સાયવર-બ્રન્ટ (૧૦ ઇનિંગ્સમાં ૫૨૩ રન) (મુંબઈ)
પર્પલ કૅપ : મેલી કૅર (૧૦ ઇનિંગ્સમાં ૧૮ વિકેટ) (મુંબઈ)
ઇમર્જિંગ પ્લેયર ઑફ ધ સીઝન : અમનજોત કૌર (૧૨૮ રન, પાંચ વિકેટ) (મુંબઈ)
ગ્રીન ડોટ બૉલ ઑફ ધ સીઝન : શબનમ ઇસ્માઇલ (૧૩૧ ડોટ બૉલ) (મુંબઈ)
સુપર સ્ટ્રાઇકર ઑફ ધ સીઝન : ચિનેલ હેન્રી (૧૯૬.૩૮) (યુપી વૉરિયર્સ)
કૅચ ઑફ ધ સીઝન : એનાબેલ સધરલૅન્ડ (દિલ્હી કૅપિટલ્સ)
એક સીઝનમાં સૌથી વધુ છગ્ગા : ઍશ્લે ગાર્ડનર (૧૮ છગ્ગા) (ગુજરાત)
ફેરપ્લે અવૉર્ડ : ગુજરાત જાયન્ટ્સ