સ્પેન સતત ૩૬મી મૅચમાં અપરાજિત રહીને ફુટબૉલ વર્લ્ડ કપની સેમી-ફાઇનલમાં પહોંચ્યું

ક્વૉર્ટર ફાઇનલમાં બેલ્જિયમ સામે ૨-૧થી જીત મેળવી, સેમી-ફાઇનલમાં ફ્રાન્સ સામે ટક્કર થશે

આ ક્વૉર્ટર ફાઇનલ મૅચમાં સ્પેનના ૧૮ વર્ષના યંગ ફુટબૉલર લામિન યમાલનો ત્રણ વર્ષનો ભાઈ કીન છવાઈ ગયો હતો

લૉસ ઍન્જલસ સ્ટેડિયમમાં ગઈ કાલે ક્વૉર્ટર ફાઇનલમાં બેલ્જિયમ સામે સ્પેનની ટીમે ૨-૧થી જીત મેળવી હતી. સ્પેન ૨૦૧૦ પછી પહેલી વાર અને એકંદરે બીજી વખત ફુટબૉલ વર્લ્ડ કપ સેમી-ફાઇનલમાં પહોંચ્યું હતું. ૧૫ જુલાઈએ પહેલી સેમી-ફાઇનલમાં ફ્રાન્સ સામે સ્પેનની ટક્કર થશે.

સ્પેનની ટીમે સતત ૩૬મી ઇન્ટરનૅશનલ મૅચમાં ન હારવાનો સિલસિલો ચાલુ રાખ્યો હતો. આ ૩૬ મૅચમાં સ્પેનને ૨૭ જીત મળી છે અને ૯ મૅચ ડ્રૉ રહી છે. તેઓએ હવે આર્જેન્ટિનાના સતત ૩૬ મૅચોમાં ન હારવાના રેકૉર્ડની બરાબરી કરી છે. આ બન્નેની આગળ માત્ર ઇટલી છે. તેઓ ૨૦૧૮થી ૨૦૨૧ વચ્ચે ૩૭ મૅચોમાં અપરાજિત રહ્યા હતા.

વર્લ્ડ કપ મૅચ વચ્ચે લામિન યમાલનો નાનો ભાઈ છવાઈ ગયો
આ ક્વૉર્ટર ફાઇનલ મૅચમાં સ્પેનના ૧૮ વર્ષના યંગ ફુટબૉલર લામિન યમાલનો ત્રણ વર્ષનો ભાઈ કીન છવાઈ ગયો હતો. સ્પેનના દરેક ગોલ પર તે જીભ કાઢીને ડાન્સ કરતો જોવા મળ્યો હતો. સ્ટેડિયમની બિગ સ્ક્રીન પર તેનો ડાન્સ જોઈને લામિન યમાલ પણ મેદાન પર હસી પડ્યો હતો. સોશ્યલ મીડિયા પર કીનને ભરપૂર પ્રેમ મળી રહ્યો છે.