18 May, 2026 02:48 PM IST | New Delhi | Gujarati Mid-day Correspondent
સાત્વિક અને ચિરાગ
સાત્વિક સાઈરાજ રૅન્કીરેડ્ડી અને ચિરાગ શેટ્ટીની ભારતીય બૅડ્મિન્ટન જોડી થાઇલૅન્ડ ઓપન 2026માં મેન્સ ડબલ્સની ફાઇનલમાં ઇન્ડોનેશિયાની જોડી સામે હારી ગઈ છે. સિલ્વર મેડલ જીતનાર સાત્વિક અને ચિરાગનો ફાઇનલ મૅચમાં ૧૨-૨૧, ૨૩-૨૫થી પરાજય થયો હતો. ૨૦૧૯ અને ૨૦૨૪માં ટાઇટલ જીત્યા બાદ આ ભારતીય જોડી તેમના ત્રીજા થાઇલૅન્ડ ઓપન ટાઇટલ પર નજર રાખી રહી હતી. મેન્સ સિંગલ્સમાં લક્ષ્ય સેન અને વિમેન્સ સિંગલ્સમાં પી. વી. સિંધુ ક્વૉર્ટર ફાઇનલમાં પહોંચીને મેડલ જીતવાની રેસમાં હાર્યાં હતાં. હાર્યા છતાં આ ટુર્નામેન્ટ ભારતીય જોડી સાત્વિક-ચિરાગ માટે પ્રોત્સાહક પુનરાગમન સાબિત થઈ છે. તેઓ ૨૦૨૬ સીઝનની તેમની પ્રથમ ફાઇનલમાં રમી રહ્યા હતા. ઇન્જરીને કારણે બન્નેએ એશિયા ચૅમ્પિયનશિપ અને સ્વિસ ઓપન જેવી ઘણી મોટી ટુર્નામેન્ટમાંથી ખસી જવાની ફરજ પડી હતી. થોમસ કપમાં ભારતીય ટીમ સાથે બ્રૉન્ઝ જીત્યા બાદ બન્નેએ બૅડ્મિન્ટનની રમત માટે ભારતમાં ઓછું પ્રોત્સાહન મળતું હોવાનો મુદ્દો ઉઠાવ્યો હતો.
