13 August, 2024 07:15 AM IST | Paris | Gujarati Mid-day Correspondent
લેઓં મર્ચોંએ
ફ્રાન્સના ૨૧ વર્ષના સ્વિમર લેઓં મર્ચોંએ પૅરિસ ઑલિમ્પિક્સમાં ચાર ગોલ્ડ અને એક બ્રૉન્ઝ સાથે કુલ પાંચ મેડલ જીત્યા છે. તેણે ૧૮૪ દેશ કરતાં વધુ ગોલ્ડ મેડલ મેળવ્યા છે. ૧૮૪ દેશ આ વખતે આ ફ્રેન્ચ સ્વિમર જેટલા ગોલ્ડ જીતી શક્યા નથી. પોતાની પ્રથમ ઑલિમ્પિક્સમાં ઐતિહાસિક પ્રદર્શન કરનાર આ ખેલાડીને ઑલિમ્પિક જ્યોતને ક્લોઝિંગ સેરેમની સુધી લઈ આવવાની તક મળી હતી. ૧૯૭૬ પછી ઑલિમ્પિક ગેમ્સમાં એક જ દિવસમાં બે ગોલ્ડ મેડલ જીતનાર તે પ્રથમ સ્વિમર બન્યો હતો. સ્વિમિંગમાં ત્રણ કે એથી વધુ ગોલ્ડ મેડલ જીતનાર તે પ્રથમ ફ્રેન્ચ છે.
પાકિસ્તાનમાં માતા સાથે અરશદ નદીમ
પૅરિસ ઑલિમ્પિક્સમાં ગોલ્ડ મેડલ જીત્યા બાદ પાકિસ્તાની જૅવલિન થ્રોઅર અર્શદ નદીમ પર પુરસ્કારોની વર્ષા થઈ રહી છે. ૨૭ વર્ષના ગોલ્ડ મેડલિસ્ટને તેનાં સાસરિયાંઓ તરફથી પણ ભેટ મળી હતી, જે એક ભેંસ છે. સાસરિયાંઓએ અર્શદ નદીમને ભેંસ કેમ આપી એનો જવાબ પણ ઘણો રસપ્રદ છે. તેમના ગામમાં ભેંસ ભેટમાં આપવી એ ખૂબ મૂલ્યવાન અને આદરણીય માનવામાં આવે છે.
પૅરિસ ઑલિમ્પિક્સમાં ૭ જેટલા ખેલાડીઓ એવા હતા જેમણે ગોલ્ડ, સિલ્વર અને બ્રૉન્ઝ મેડલ જીતવાનો આનંદ માણ્યો છે. આ ૭ ખેલાડીઓના લિસ્ટમાં ઑસ્ટ્રેલિયાના ત્રણ સ્વિમરો, અમેરિકાના બે સ્વિમરો, બ્રાઝિલના એક જિમ્નૅસ્ટ અને નેધરલૅન્ડ્સના એક ટ્રૅક ઍન્ડ ફીલ્ડ ઍથ્લીટનો સમાવેશ છે. આ બધાએ એક જ ઑલિમ્પિક્સમાં ત્રણેય મેડલ જીતવાની સિદ્ધિ મેળવી હતી.