06 October, 2026 02:25 PM IST | Mumbai | Gujarati Mid-day Correspondent
અરિજિત સિંહ
અરિજિત સિંહે આવતા વર્ષ માટે પોતાની ‘ઇન્ડિયા ટૂર’ની જાહેરાત કરી છે. સંગીતક્ષેત્રે પોતાની કારકિર્દીનાં ૨૦ વર્ષ પૂર્ણ થવાના અવસરે અરિજિત દેશનાં ૯ શહેરોમાં સ્ટેડિયમ સ્તરની કૉન્સર્ટ કરશે. આ પ્રવાસ જાન્યુઆરીથી મે સુધી ચાલશે. કૉન્સર્ટમાં અરિજિત સિંહનાં ‘અગર તુમ સાથ હો’, ‘તુમ હી હો’, ‘વિદા કરો’ સહિત અનેક લોકપ્રિય ગીતો લાઇવ રજૂ કરવામાં આવશે.
અરિજિત સિંહે આ વર્ષે જાન્યુઆરીમાં પ્લેબૅક સિન્ગિંગમાંથી નિવૃત્તિ લેવાની જાહેરાત કરીને બધાને ચોંકાવી દીધા હતા. તેણે કહ્યું હતું કે હવે તે કલાકાર તરીકે પોતાની સર્જનાત્મક સફરને વધુ વિસ્તારવા માગે છે.
અરિજિત સિંહના આ પ્રવાસ દરમ્યાન અમદાવાદ, ચંડીગઢ, જયપુર, મુંબઈ, બૅન્ગલોર, નવી દિલ્હી, પુણે, ઇન્દોર અને હૈદરાબાદમાં કૉન્સર્ટ કરશે. આ તમામ કૉન્સર્ટ સ્ટેડિયમ સ્તરની હશે જેથી મોટી સંખ્યામાં ચાહકો અરિજિતને લાઇવ સાંભળી અને નજીકથી જોઈ શકે. કૉન્સર્ટ માટે ખાસ મલ્ટિ-લેવલ સ્ટેજ તૈયાર કરવામાં આવશે. સ્ટેજ પરથી એક લાંબો રૅમ્પ સીધો દર્શકોની વચ્ચે જશે જેથી અરિજિત સિંહ ચાહકોની વધુ નજીક રહીને પર્ફોર્મ કરી શકે.
