બહોત હો ગયા

સતત ટ્રોલ થતાં રિચા ચઢ્ઢાએ ટ્વિટર પ્રોફાઇલ કરી લૉક

બહોત હો ગયા

રિચા ચઢ્ઢાએ તેની ટ્વિટર પ્રોફાઇલને લૉક કરી દીધી છે. તેમ જ તેણે તેના મોબાઇલમાંથી આ ઍપ્લિકેશનને પણ ડિલીટ કરી દીધી છે. તેના ટ્વિટર પર ઘણા ફૉલોઅર્સ છે અને તેણે ગઈ કાલે સવારે જ પ્રોફાઇલ લૉક કરી હતી. તેને હાલમાં જ ટ્વિટર પર ટ્રોલ કરવામાં આવી હતી. એક યુઝરે તેને પૂછ્યું હતું કે તું ક્યારે ડિવૉર્સ લેશે, કારણ કે તારાં લગ્ન પણ અલી ફઝલ સાથે વધુ નહીં ચાલે. આમિર ખાનની જેમ તું પણ જલદી ડિવૉર્સ લેશે. આ ટ્વીટનો જડબાતોડ જવાબ આપતાં રિચાએ ટ્વીટ કર્યું હતું કે ‘સરવેશ, તું મારી વાત છોડ. તું ગાંડો થઈ રહ્યો છે, કારણ કે તારી સાથે કોઈ રાજીખુશીથી લગ્ન નથી કરી રહ્યું? તારા કેસમાં કદાચ એવું બનશે કે છોકરી દહેજ માગશે. તારી પાસે લુક પણ નથી અને તું એટલો ઇન્ટેલિજન્ટ પણ નથી અને તું ગરીબ પણ દેખાય છે! તારી મમ્મીએ એલપીજીની જગ્યાએ હવે ચૂલાનો ઉપયોગ કરવો પડતો હશે. આન્ટી, તમારી સાથે મારી સાંત્વના છે. તમે આ દુનિયામાં કેવો નાલાયક માણસ લઈને આવ્યા છો. આ બેરોજગાર માણસ ફક્ત અહીં જ બોલી શકે એમ છે.’
જવાબ આપ્યાં બાદ રિચાએ ટ્વીટ કર્યું કે ‘મારા મોબાઇલમાંથી આ ઍપ્લિકેશન ડિલીટ કરી રહી છું. ખૂબ જ સમય લે છે અને એટલું જ ટૉક્સિક પણ છે. આવજો.’