માતૃભૂમિ : મે વૉર રેસ્ટ ઇન પીસ સીધી OTT પર આવશે?

આ અફવા વચ્ચે ફિલ્મ સાથે સંકળાયેલી વ્યક્તિએ કરી સ્પષ્ટતા

ફિલ્મનો સીન

સલમાન ખાનની આગામી ફિલ્મ ‘માતૃભૂમિ : મે વૉર રેસ્ટ ઇન પીસ’ની રિલીઝ માટે ચાહકો આતુરતાથી રાહ જોઈ રહ્યા છે. થોડા સમય પહેલાં આ ફિલ્મમાંથી ચીન સંબંધિત રેફરન્સ હટાવવામાં આવ્યા હોવાની ખબર આવી હતી. ત્યાર બાદ એવી અફવા ફેલાઈ હતી કે ફિલ્મ થિયેટરોમાં રિલીઝ થવાને બદલે સીધી OTT પ્લૅટફૉર્મ પર આવી શકે છે. હવે આ મુદ્દે પ્રોજેક્ટ સાથે જોડાયેલી વ્યક્તિએ હકીકત જણાવી છે.

રિપોર્ટ મુજબ ફિલ્મને થિયેટરમાં રિલીઝ નહીં કરવામાં આવે એવી ચર્ચાને ખોટી ગણાવીને કહેવામાં આવ્યું છે કે આ ફિલ્મ મોટા પડદા માટે જ બનાવવામાં આવી છે એથી સલમાન અને નિર્દેશક અપૂર્વ લાખિયા બન્ને ફિલ્મ સાથે જોડાયેલા મુદ્દાઓ ઉકેલાયા પછી એને થિયેટરોમાં જ રિલીઝ કરવા પ્રતિબદ્ધ છે.

ઇન્ડસ્ટ્રીના જાણકારોએ જણાવ્યું હતું કે ઘણા લોકોમાં એવી ગેરસમજ છે કે OTT પ્લૅટફૉર્મ પર કોઈ સેન્સરશિપ નથી. હકીકતમાં  OTT પર રિલીઝ થતી ફિલ્મોએ પણ થિયેટર-ફિલ્મ જેવી જ 
સર્ટિફિકેશન-પ્રક્રિયામાંથી પસાર થવું પડે છે એટલે સીધી OTT રિલીઝ માટે પણ ફિલ્મને જનતા સમક્ષ રજૂ કરતાં પહેલાં સરકારની મંજૂરી લેવી જરૂરી હોય છે.

મોટા ફેરફારો

‘માતૃભૂમિ : મે વૉર રેસ્ટ ઇન પીસ’ વિશે વાત કરીએ તો આ ફિલ્મમાં ઘણા ફેરફાર કરવામાં આવ્યા છે. માર્ચ સુધી ફિલ્મનું નામ ‘બૅટલ ઑફ ગલવાન’ હતું અને એ ગલવાન ખીણમાં ભારતીય અને ચીની સેનાઓ વચ્ચે થયેલી વાસ્તવિક અથડામણથી પ્રેરિત હોવાનું કહેવાતું હતું. હવે ફિલ્મનું શીર્ષક બદલાઈ ગયું છે તેમ જ ચીન અને ગલવાન ખીણના તમામ સંદર્ભો દૂર કરવામાં આવ્યા છે અને ફિલ્મનું મોટા પાયે રીશૂટિંગ કરવામાં આવી રહ્યું છે.