03 October, 2026 12:46 PM IST | Mumbai | Gujarati Mid-day Correspondent
સંજય દત્તે ગયામાં કર્યું પિંડદાન
સંજય દત્તે પિતૃપક્ષના દિવસોમાં બિહારના ગયા શહેરમાં આવેલા વિષ્ણુપદ મંદિરમાં પિંડદાનની વિધિ કરી હતી. સંજય દત્તે પોતાનાં દિવંગત માતા-પિતા સુનીલ દત્ત અને નરગિસના આત્માની શાંતિ માટે પ્રાર્થના કરી હતી. પિંડદાન એક હિન્દુ ધાર્મિક વિધિ છે, જેમાં દિવંગત વ્યક્તિને શ્રદ્ધાંજલિ આપવામાં આવે છે. આ વિધિ દિવંગત વ્યક્તિના પરિવારજનો દ્વારા ગયાનાં ત્રણ પવિત્ર સ્થળો ફલ્ગુ નદી, વિષ્ણુપદ મંદિર અને અક્ષયવટના વૃક્ષ પાસે કરવામાં આવે છે.
સંજય દત્તની આ વિધિ કરાવતી અનેક તસવીરો સોશ્યલ મીડિયા પર સામે આવી છે. આ તસવીરોમાં તે મંદિરમાં બેસીને પૂજાની વિધિ કરતો જોવા મળી રહ્યો છે. તેની સાથે અનેક પંડિતો પણ હાજર હતા. આ ધાર્મિક વિધિ પૂર્ણ કરવામાં લગભગ બે કલાકનો સમય લાગે છે અને એને એક જ દિવસમાં પૂર્ણ કરી શકાય છે. વિધિ પૂર્ણ કર્યા બાદ સંજય દત્ત મંદિરની બહાર હાજર પોતાના ચાહકોને પણ મળ્યો હતો.
