કપિલ શર્માના શોમાં દેખાશે વર્લ્ડ કપ વિજેતા ભારતીય મહિલા ક્રિકેટરો, પણ સ્મૃતિ માન્ધના એમાં નહીં હોય

‘ધ ગ્રેટ ઇન્ડિયન કપિલ શો’માં વિમેન્સ વન-ડે વર્લ્ડ કપ વિજેતા ભારતીય ટીમની પ્લેયર્સ

‘ધ ગ્રેટ ઇન્ડિયન કપિલ શો’ની ચોથી સીઝનની શરૂઆત પ્રિયંકા ચોપડા સાથેના એપિસોડ સાથે થઈ ગઈ છે અને હવે આ શોમાં વિમેન્સ વન-ડે વર્લ્ડ કપ વિજેતા ભારતીય ટીમની પ્લેયર્સ જોવા મળવાની છે. કપિલ શર્માના શોના આ એપિસોડનો પ્રોમો બુધવારે રિલીઝ કરવામાં આવ્યો હતો. આ પ્રોમોમાં કપિલ સાથે કૅપ્ટન હરમનપ્રીત કૌર, જેમિમા રૉ​ડ્રિગ્સ, શફાલી વર્મા, રિચા ઘોષ, રેણુકા સિંહ ઠાકુર, દીપ્તિ શર્મા, હરલીન દેઓલ, રાધા યાદવ, પ્રતીકા રાવલ જેવી પ્લેયર્સ જોવા મળે છે. ટીમનો હેડ કોચ અમોલ મઝુમદાર પણ આ શોમાં જોડાયો હતો. જોકે આ બધામાં વાઇસ-કૅપ્ટન સ્મૃતિ માન્ધનાની ગેરહાજરી સ્પષ્ટ વર્તાઈ આવે છે.

એવું લાગે છે કે સ્મૃતિની પર્સનલ લાઇફમાં તાજેતરમાં જ ઊથલપાથલ થઈ એ પછી તેણે આ પ્રોગ્રામમાં જવાનું ટાળ્યું છે. સ્મૃતિ ૨૩ નવેમ્બરે સંગીતકાર અને ફિલ્મમેકર પલાશ મુચ્છલ સાથે લગ્ન કરવાની હતી, પણ છેલ્લી ઘડીએ આ લગ્ન મોકૂફ રાખવાની જાહેરાત કરવામાં આવી હતી અને ત્યાર બાદ થોડા દિવસ પહેલાં સ્મૃતિએ આ લગ્ન રદ થઈ ગયાં હોવાની ઘોષણા કરી હતી.