શાહરૂખ ખાનના `મન્નત`માં આ વણનોતર્યા મહેમાનની એન્ટ્રી, ખાન પરિવાર ગભરાયો

Snake found at Shah Rukh Khan’s ‘Mannat’ bungalow: શાહરૂખ ખાનના `મન્નત`માં સોમવારે રાત્રે બે સાપ ઘુસી જતા વાતાવરણ ગંભીર બન્યું હતું; વન વિભાગના અધિકારીઓએ એક સાપને સુરક્ષિત રીતે રેસ્ક્યૂ કરીને કુદરતી વાતાવરણમાં મુક્ત કર્યો હતો

શાહરુખ ખાનની ફાઇલ તસવીર

બોલિવૂડ (Bollywood) સુપરસ્ટાર શાહરૂખ ખાન (Shah Rukh Khan) ના મુંબઈ (Mumbai) સ્થિત આલીશાન બંગલા `મન્નત` (Mannat) માં બે વણનોતર્યા મહેમાન જોવા મળતાં ભારે ચકચાર મચી ગઈ હતી. અભિનેતાના બંગલામાં સાપ દેખાતાં જ તાત્કાલિક રેસ્ક્યૂ ઓપરેશન હાથ ધરવામાં આવ્યું હતું, જેમાં એક સાપને સુરક્ષિત રીતે પકડી લેવામાં આવ્યો હતો જ્યારે બીજો સાપ ભાગી જવામાં સફળ રહ્યો હતો.

મુંબઈના બાંદ્રા (Bandra) વેસ્ટ સ્થિત શાહરૂખ ખાનના દરિયાકિનારે આવેલા આલીશાન બંગલા `મન્નત`ના પરિસરમાં સોમવાર, ૧૭ ઓગસ્ટની સાંજે બે સાપ જોવા મળતાં ચકચાર મચી ગઈ હતી. આ અણધારી ઘટના બાદ (Snake found at Shah Rukh Khan’s ‘Mannat’ bungalow) તાત્કાલિક સ્નેક રેસ્ક્યૂઅરને બોલાવવામાં આવ્યા હતા, જેમણે ૮ ફૂટ લાંબા બિન-ઝેરી સાપનું સફળતાપૂર્વક રેસ્ક્યૂ કરીને તેને કુદરતી આવાસમાં છોડ્યો હતો, જ્યારે બીજો સાપ ભાગી જવામાં સફળ રહ્યો હતો.

બે સાપ દેખાતાં સ્નેક રેસ્ક્યૂઅરને બોલાવાયા

સોમવારે રાત્રે આશરે ૮:૦૦ વાગ્યે સર્પમિત્ર (સ્નેક રેસ્ક્યૂઅર) વિક્કી દુબે (Vicky Dubey)ને માહિતી મળી હતી કે `મન્નત`ના આંગણા અને લોન વિસ્તાર નજીક બે સાપ ફરતા જોવા મળ્યા છે. દુબેએ તાત્કાલિક વન વિભાગના રાઉન્ડ ઓફિસર દીપક દાદા ગાયકવાડ (Forest Department Round Officer Deepak Dada Gaikwad) અને ઠાણે (Thane) સ્થિત મુંબઈ રેન્જ ઓફિસ કંટ્રોલ રૂમ (Mumbai Range Office control room) ને જાણ કરી અને બાંદ્રા પહોંચ્યા હતા.

`મન્નત` પહોંચ્યા બાદ ટીમે પરિસરમાં શોધખોળ શરૂ કરી હતી, જ્યાં આંગણામાં આવેલી સીડીઓ નીચે છુપાયેલો ૮ ફૂટ લાંબો ધામણ સાપ એટલે ઇન્ડિયન રેટ સ્નેક (Ptyas mucosa) મળી આવ્યો હતો.

બિન-ઝેરી સાપને કુદરતી વાતાવરણમાં મુક્ત કરાયો

રેસ્ક્યૂ ટીમ નજીક પહોંચતાં આ ૮ ફૂટ લાંબો ધામણ સાપ સીડીઓ નીચે કુંડળી મારીને બેસી ગયો હતો. રેસ્ક્યૂ ટીમે સાપ કે ત્યાંના સ્ટાફને કોઈ નુકસાન પહોંચાડ્યા વિના તેને સુરક્ષિત રીતે પકડી લીધો હતો.

મહારાષ્ટ્ર વન વિભાગના નિર્ધારિત પ્રોટોકોલનું પાલન કરીને, આ બિન-ઝેરી સાપને સુરક્ષિત કન્ટેનરમાં મૂકીને બાદમાં તેના કુદરતી વાતાવરણમાં મુક્ત કરવામાં આવ્યો હતો. સર્પમિત્ર વિક્કી દુબેએ મન્નતના સુરક્ષા કર્મચારીઓ અને સ્ટાફને સાપની પ્રજાતિ વિશે માહિતગાર કરીને આશ્વાસન આપ્યું હતું કે આ સાપ ઝેરી નહોતો અને તેનાથી કોઈ ભય નથી.

ભાગી છૂટેલા બીજા સાપની શોધખોળ ચાલુ

પ્રથમ સાપને સફળતાપૂર્વક પકડી લેવાયો હતો, પરંતુ બીજો સાપ માનવ સળવળાટથી ગભરાઈને પરિસરમાંથી ભાગી છૂટ્યો હતો. સોમવારે મોડી રાત સુધી બંગલાની ચોતરફ શોધખોળ હાથ ધરવામાં આવી હતી, પરંતુ બીજો સાપ મળી આવ્યો નહોતો.

ચોમાસાની ઋતુમાં દરો અને લીલોતરીમાં પાણી ભરાઈ જવાને કારણે મુંબઈ જેવા શહેરી વિસ્તારોમાં સાપ જોવા મળવાની ઘટનાઓ વધી જાય છે. આ ઘટના બાદ `મન્નત`ના સ્ટાફ અને સુરક્ષા કર્મચારીઓને એલર્ટ પર રખાયા છે અને વન વિભાગની ટીમ પણ વિસ્તાર પર નજર રાખી રહી છે.