22 August, 2026 09:44 AM IST | Hyderabad | Gujarati Mid-day Correspondent
યશ નવીન કુમાર ગૌડા
યશની ૨૬ ઑગસ્ટે રિલીઝ થનારી ‘ટૉક્સિક’ને સેન્ટ્રલ બોર્ડ ઑફ ફિલ્મ સર્ટિફિકેશન (CBFC) તરફથી ક્લિયરન્સ મળી ગયું છે. ખાસ વાત એ છે કે ફિલ્મમાં એક પણ કટની માગ કરવામાં આવી નથી અને માત્ર બે નાના ફેરફાર સૂચવવામાં આવ્યા છે. હિંસક બદલો લેવાની વાર્તા ધરાવતી આ ફિલ્મને અત્યાર સુધીની સૌથી બોલ્ડ અને હિંસક ભારતીય ફિલ્મોમાંની એક ગણાવવામાં આવી રહી છે. આ સંજોગોમાં ‘ટૉક્સિક’ને ‘નો-કટ’ સર્ટિફિકેશન મળ્યાની વાત સોશ્યલ મીડિયા પર સામે આવતાં લોકોમાં ચર્ચા શરૂ થઈ ગઈ છે. CBFC સર્ટિફિકેટ મુજબ કન્નડા અને અંગ્રેજીમાં બનેલી આ ફિલ્મનો સમયગાળો ૩ કલાક ૧૨ મિનિટ છે.
CBFCએ માત્ર કન્નડા વર્ઝનમાં બે શબ્દો અને વાક્યોને મ્યુટ કરીને બદલવા માટે કહ્યું છે. આ જ પ્રકારના ફેરફાર અંગ્રેજી સબટાઇટલ્સમાં પણ કરવામાં આવશે. આ ઉપરાંત ધૂમ્રપાન અને દારૂના સેવનને લઈને ફરજિયાત ચેતવણી પણ ઉમેરવાની રહેશે. આ સિવાય CBFCએ ફિલ્મમાં કોઈ કટની માગ કરી નથી. જોકે ફિલ્મને ‘A’ સર્ટિફિકેટ આપવામાં આવ્યું છે.
યશની ‘ટૉક્સિક’ ૨૬ ઑગસ્ટે રિલીઝ થવાની છે ત્યારે ફિલ્મના મેકર્સે આજે હૈદરાબાદમાં એક ભવ્ય પ્રી-રિલીઝ ઇવેન્ટનું આયોજન કર્યું છે. ફિલ્મ માટે પ્રોડક્શન ટીમની આ છેલ્લી પ્રમોશનલ ઍક્ટિવિટી હશે. ‘ટૉક્સિક’ની ગ્રૅન્ડ પ્રી-રિલીઝ ઇવેન્ટમાં ફિલ્મની સમગ્ર સ્ટારકાસ્ટ પણ હાજર રહેશે. આ કાર્યક્રમ હૈદરાબાદની મલ્લા રેડ્ડી યુનિવર્સિટીમાં સાંજે પાંચ વાગ્યે શરૂ થશે. આ ઇવેન્ટ છેલ્લા ઘણા મહિનાઓથી ચાલી રહેલા ફિલ્મના પ્રમોશનલ કૅમ્પેનનું સમાપન કરશે.
પ્રી-રિલીઝ ગૅધરિંગમાં ફિલ્મની રિલીઝ પહેલાં કાસ્ટ, કસબીઓ અને ચાહકો એકસાથે આવશે. ‘ટૉક્સિક’ હિન્દી, તેલુગુ, તામિલ, કન્નડા અને અંગ્રેજી ભાષામાં પણ રિલીઝ થશે. આ કાર્યક્રમમાં બધું યોગ્ય રીતે થાય અને ભીડને સારી રીતે સંભાળી શકાય એ માટે સુરક્ષા તથા વેન્યુ સાથે જોડાયેલી તૈયારીઓને આખરી ઓપ આપવામાં આવી રહ્યો છે.
