06 May, 2026 05:19 PM IST | Mumbai | Gujarati Mid-day Correspondent
ગરમીમાં પણ જ્વેલરી લેયરિંગ સાથે મેળવો સ્માર્ટ અને સ્ટાઇલિશ લુક
ઉનાળામાં આપણી સૌથી મોટી ચિંતા એ હોય છે કે ઘરેણાં પહેરવાથી પરસેવો વળશે અને એને કારણે ગળા કે કાંડા પર લાલ ચકામાં અથવા કાળા ડાઘ પડી જશે. આ કારણે જ ઘણી સ્ત્રીઓ ફૅશન સાથે બાંધછોડ કરીને સાદગી અપનાવી લે છે. જોકે શું તમે જાણો છો કે સાચી ધાતુ અને સ્માર્ટ ડિઝાઇનની પસંદગી કરવાથી ઘરેણાં માત્ર તમારી સુંદરતા જ નથી વધારતાં, તમારી ત્વચાને ઠંડક પણ આપી શકે છે...
ઉનાળાની આકરી ગરમી અને અકળાવનારા ભેજમાં જ્યારે ભારે કપડાં કે ઘરેણાં પહેરવાં મુશ્કેલ બની જાય છે ત્યારે ફૅશનજગતમાં અત્યારે સ્માર્ટ જ્વેલરી લેયરિંગનો ટ્રેન્ડ ખૂબ જ લોકપ્રિય થઈ રહ્યો છે. સામાન્ય રીતે સ્ત્રીઓને એવી મૂંઝવણ હોય છે કે ઘરેણાં પહેરવાથી પરસેવો અને ઇરિટેશન વધશે, પરંતુ જો યોગ્ય પદ્ધતિ અને સામગ્રીની પસંદગી કરવામાં આવે તો તમે ઉનાળામાં પણ અત્યંત સ્ટાઇલિશ દેખાઈ શકો છો. આ સીઝનમાં જ્વેલરી સ્ટાઇલ કરવા માટેની કેટલીક અનોખી રીતો જાણીએ.
સૌપ્રથમ ગળાના ઘરેણાની વાત કરીએ તો રૂલ ઑફ થ્રી એટલે કે ત્રણના નિયમ દ્વારા તમે અદ્ભુત નેકલેસ લેયરિંગ કરી શકો છો. આમાં તમારે સૌથી પહેલાં એક નાજુક ચોકર અથવા પાતળી ચેઇન પહેરવી જોઈએ. ત્યાર બાદ મધ્યમ લંબાઈની ચેઇન અને સૌથી નીચે એક લાંબું પેન્ડન્ટ પહેરવાથી એક સંતુલિત લુક મળે છે. ઉનાળામાં ખાસ કરીને હલકા વજનની ચેઇન અને પેસ્ટલ કલરનાં રત્નો જેવાં કે રુબી કે સિટ્રિન (સેમી-પ્રેશ્યસ સ્ટોન)નો ઉપયોગ કરવાથી લુકમાં તાજગી ઉમેરાય છે.
ગળાની જેમ જ કાનની સુંદરતા વધારવા માટે ક્યુરેટેડ ઇઅર ટેક્નિક અત્યારે ટ્રેન્ડમાં છે. ઉનાળામાં આપણે મોટા ભાગે વાળ ઉપર બાંધતા હોઈએ છીએ ત્યારે મોટા હોલો હોપ્સ (કુંડળ) સાથે નાના સ્ટડ્સ (બુટ્ટી) અથવા હગીસ (કાનને ચોંટેલી નાની રિંગ્સ)નું મિશ્રણ કાનને ખૂબ જ આકર્ષક લુક આપે છે. જો તમને થોડો બોલ્ડ લુક ગમતો હોય તો સિલ્વર કે ગોલ્ડ ઇઅર કફનો ઉપયોગ પણ કરી શકાય છે.
હાથની સુંદરતા માટે ભારે બંગડીઓને બદલે ફ્લેક્સિબલ અને લાઇટ ટેનિસ બ્રેસલેટ (હીરાની પાતળી હારમાળાવાળું બ્રેસલેટ) કે સ્પાયરલ કફ (કાંડા પર વીંટળાઈ જતું સ્પ્રિંગ જેવું બ્રેસલેટ) પસંદ કરવાં જોઈએ. ઓપન-લિંક ડિઝાઇન (કડીઓ વચ્ચે જગ્યા ધરાવતી હવાઉજાસવાળી ડિઝાઇન) ધરાવતાં બ્રેસલેટ ઉનાળામાં વધુ આરામદાયક રહે છે, કારણ કે એ ત્વચા અને ઘરેણા વચ્ચે હવાની અવરજવર જાળવી રાખે છે, જેનાથી ભેજ જમા થતો નથી.
પગની સુંદરતા માટે સિલ્વર પાયલ એટલે કે એન્કલેટ્સનું લેયરિંગ પણ એક નવો ટ્રેન્ડ છે. સ્લિપ-ઑન (લેસ કે દોરી વગરનાં સરળતાથી પહેરી શકાય એવાં શૂઝ) કે મ્યુલ્સ (પાછળ એડીના ભાગથી ખુલ્લાં હોય એવાં ફુટવેઅર) સાથે ચાંદીની પાતળી ચેઇન અને બ્લૅક કૉર્ડ (દોરા)વાળી પાયલ ખૂબ સુંદર લાગે છે. ચાંદીમાં કુદરતી ઠંડક આપવાના ગુણધર્મો હોવાથી એ ઉનાળામાં ત્વચા માટે ખૂબ જ હિતકારી છે.
આંગળીઓ માટે નેગેટિવ સ્પેસ ટેક્નિકનો ઉપયોગ કરવો જોઈએ. ગરમીમાં આંગળીઓમાં આવતા સામાન્ય સોજાને ધ્યાનમાં રાખીને વચ્ચે ગૅપ હોય એવી અથવા પાતળી બૅન્ડ્સવાળી રિંગ્સ પસંદ કરવી હિતાવહ છે. ઇન્ડેક્સ ફિંગરમાં એક થોડી જાડી રિંગ અને રિંગ ફિંગરમાં બે અલ્ટ્રા-થિન મિડી રિંગ્સ પહેરવાથી સ્માર્ટ લુક મળે છે.
આજના સમયમાં ફૅશન માત્ર દેખાવ પૂરતી મર્યાદિત નથી પણ સ્માર્ટ બની રહી છે. સોના અને ચાંદીના દાગીના ઉનાળા માટે શ્રેષ્ઠ છે કારણ કે એ હાઇપોઍલર્જેનિક હોય છે, જે પરસેવાને કારણે ત્વચા પર ડાઘ થવા નથી દેતા કે ખંજવાળ આવવા દેતા નથી. આમ યોગ્ય પસંદગી અને સ્ટાઇલ દ્વારા તમે ગરમીમાં પણ કમ્ફર્ટ સાથે કૉન્ફિડન્ટ દેખાઈ શકો છો.
