14 May, 2026 07:13 PM IST | Mumbai | Gujarati Mid-day Correspondent
ક્યુબન કૉલર શર્ટ
જો તમે આ ઉનાળામાં સ્ટાઇલિશ, આરામદાયક અને થોડો અલગ લુક મેળવવા માગતા હો તો ક્યુબન કૉલર શર્ટ તમારા વૉર્ડરોબમાં હોવું જ જોઈએ. સામાન્ય શર્ટમાં કૉલર બંધ હોય છે અને એને ટાઇ સાથે પહેરી શકાય છે, પરંતુ ક્યુબન કૉલર શર્ટ એની ખાસ ઓપન ડિઝાઇન માટે જાણીતાં છે. આ શર્ટમાં ઉપરનું બટન હોતું નથી જેને કારણે એ ગળા પાસે V શેપ બનાવે છે. આ ડિઝાઇન ઉનાળામાં ગરદન પાસે હવા-ઉજાસ જાળવી રાખે છે અને લુકને એકદમ રિલૅક્સ્ડ બનાવે છે.
ખાસિયત શું?
વર્સેટાઇલ : આ શર્ટની સૌથી મોટી ખાસિયત એ છે કે એ કૅઝ્યુઅલ અને સેમી-ફૉર્મલ બન્ને લુકમાં ફિટ બેસે છે.
બ્રીધેબલ ફૅબ્રિક : મોટા ભાગે આ શર્ટ લિનન, કૉટન કે રેયૉન મટીરિયલમાં જોવા મળે છે, જે પરસેવો શોષી લે છે અને ગરમીમાં ઠંડક આપે છે.
ફ્લૅટરિંગ કટ : એની ચોરસ આકારની બૉક્સી અને લૂઝ ફિટિંગ ડિઝાઇન દરેક બૉડી-ટાઇપ પર સારી લાગે છે.
કેવી રીતે પહેરશો?
બીચ અથવા વેકેશન લુક : જો તમે બીચ પર કે કોઈ હિલ-સ્ટેશન પર જઈ રહ્યા હો તો ફ્લોરલ અથવા ટ્રૉપિકલ પ્રિન્ટવાળું ક્યુબન કૉલર શર્ટ પસંદ કરો. એને ચિનો શૉર્ટ્સ અને વાઇટ સ્નીકર્સ સાથે પહેરો.
સ્માર્ટ કૅઝ્યુઅલ : પ્લેન અથવા સૉલિડ કલરના જેમ કે ઑલિવ ગ્રીન કે નેવી બ્લુ ક્યુબન શર્ટને ઑફ વાઇટ લિનન પૅન્ટ સાથે પહેરો. આ લુકમાં તમે લોફર્સ પહેરીને વધુ ક્લાસી દેખાઈ શકો છો.
લેયરિંગ ગેમ : જો તમારે થોડો વધુ બોલ્ડ લુક જોઈએ છે તો અંદર પ્લેન વાઇટ ટી-શર્ટ પહેરીને ઉપર ક્યુબન શર્ટને ઓપન રાખો.
કલર્સ અને પ્રિન્ટની પસંદગી
આ વર્ષે ટેરાકોટા, સૅન્ડ બેજ અને સૅલ્મન પિન્ક ખૂબ ટ્રેન્ડમાં છે. જો તમે પ્રિન્ટના શોખીન હો તો વર્ટિકલ સ્ટ્રાઇપ્સ ટ્રાય કરો. એ તમને થોડા લાંબા અને પાતળા દેખાડવામાં મદદ કરશે.
ફૅશન-ટિપ
ક્યુબન કૉલર શર્ટ પહેરતી વખતે ધ્યાન રાખો કે એ વધારે પડતું લાંબું ન હોય. આ શર્ટની લંબાઈ કમર સુધી હોય તો જ એ પર્ફેક્ટ લુક આપે છે. એને પૅન્ટની અંદર ખોસવાને બદલે બહાર રાખવાથી એની સાચી સુંદરતા બહાર આવે છે.
ક્યુબન કૉલર શર્ટ એક ક્લાસિક રેટ્રો વાઇબ આપે છે અને સાથે-સાથે મૉડર્ન ફૅશન સાથે જોડી રાખે છે. તો આ ઉનાળે ટ્રેડિશનલ શર્ટ્સને થોડો આરામ આપો અને ક્યુબન કૉલર સાથે તમારી ફૅશન-ગેમને નેક્સ્ટ લેવલ પર લઈ જાઓ.
