જપાન પર ફેંકાયેલા અણુબૉમ્બ કરતાં આ પરમાણુ મિસાઇલ છે ૨૦૦ગણું શક્તિશાળી

ચીને રજૂ કર્યું DF-5C ગ્લોબલ કવરિંગ સ્ટ્રૅટેજિક ન્યુક્લિયર મિસાઇલ

DF-5C લિક્વિડ-ઈંધણવાળું ઇન્ટરકૉન્ટિનેન્ટલ સ્ટ્રૅટેજિક ન્યુક્લિયર મિસાઇલ

ચીને બુધવારે રશિયન પ્રેસિડન્ટ વ્લાદિમીર પુતિનની હાજરીમાં એની અત્યાર સુધીની સૌથી મોટી લશ્કરી પરેડ યોજી હતી અને એક નવા પ્રકારનું DF-5C લિક્વિડ-ઈંધણવાળું ઇન્ટરકૉન્ટિનેન્ટલ સ્ટ્રૅટેજિક ન્યુક્લિયર મિસાઇલ રજૂ કર્યું હતું. રશિયન મીડિયા એજન્સી સ્પુટનિકે જણાવ્યું હતું કે આ મિસાઇલ હિરોશિમા અને નાગાસાકી પર ફેંકાયેલા અણુબૉમ્બ કરતાં ૨૦૦ગણું વધુ શક્તિશાળી છે. એની રેન્જ ૨૦,૦૦૦ કિલોમીટરથી વધુ હોવાના અહેવાલ છે.

જપાની આક્રમણ અને વિશ્વ ફાસીવાદવિરોધી યુદ્ધ સામે ચીનના લોકોના પ્રતિકાર યુદ્ધમાં વિજયની ૮૦મી વર્ષગાંઠ નિમિત્તે બુધવારે ચીનની વિક્ટરી-ડે લશ્કરી પરેડમાં ચીને પોતાની લશ્કરી તાકાત બતાવી હતી. એમાં અનેક અત્યાધુનિક હથિયારોનું પ્રદર્શન કરવામાં આવ્યું હતું. જેમાં નવા પ્રકારના DF-5C પ્રવાહી ઈંધણયુક્ત ઇન્ટરકૉન્ટિનેન્ટલ વ્યૂહાત્મક પરમાણુ મિસાઇલ પણ રજૂ કરવામાં આવ્યું હતું.

DF-5Cમાં છ વિશિષ્ટ વિશેષતાઓ

• એમાં એક નવું માળખું છે. આખું મિસાઇલ ત્રણ પરિવહન વાહનો દ્વારા ત્રણ વિભાગોમાં એક સ્થળેથી બીજા સ્થળે લઈ જવાય છે. લૉન્ચ તૈયારીનો સમય અગાઉનાં DF-5 શ્રેણીનાં મિસાઇલો કરતાં ઓછો રહેશે.
• એની રેન્જ લાંબી છે અને એ સમગ્ર વિશ્વને આવરી લેવામાં સક્ષમ છે. ચીન પાસે વિશ્વનાં કોઈ પણ લશ્કરી લક્ષ્યો પર વળતો હુમલો કરવાની ક્ષમતા અને સાધન છે.
• અગાઉની DF શ્રેણીનાં વ્યૂહાત્મક મિસાઇલોની સરખામણીમાં DF-5Cની વિશેષતા એની લૉન્ચ પદ્ધતિઓમાં વિવિધતા હોઈ શકે છે.
• આ મિસાઇલની સ્પીડ જબરદસ્ત છે. એક વ્યૂહાત્મક ઇન્ટરકૉન્ટિનેન્ટલ બૅલિસ્ટિક મિસાઇલ સમગ્ર વિશ્વને આવરી શકે છે. એની ઉડાન ગતિને કારણે સમકાલીન બૅલિસ્ટિક મિસાઇલ ઇન્ટરસેપ્શન સિસ્ટમ્સને તૈયાર થવા માટે ઓછામાં ઓછો સમય મળે છે.

• DF-5C બહુવિધ સ્વતંત્ર રીતે લક્ષ્ય બનાવી શકાય એવાં રીએન્ટ્રી વાહનો (MIRV) વહન કરી શકે છે, જે પરમાણુ અથવા પરંપરાગત વૉરહેડ્સથી સજ્જ છે. ચીને અગાઉનાં DF શ્રેણીનાં ઇન્ટરકૉન્ટિનેન્ટલ બૅલિસ્ટિક મિસાઇલોમાં MIRV તકનીકોમાં નિપુણતા મેળવી લીધી છે.

• ઇન્ટરકૉન્ટિનેન્ટલ બૅલિસ્ટિક મિસાઇલો સામાન્ય રીતે ઇનર્શિયલ ગાઇડન્સ સિસ્ટમ અને સ્ટારલાઇટ ગાઇડન્સ સિસ્ટમ ટેક્નૉલૉજીનો ઉપયોગ કરે છે. ૨૦,૦૦૦ કિલોમીટર દૂરનાં લક્ષ્યો પર હુમલો કરતી વખતે પણ એ DF શ્રેણીમાં મધ્યમથી ટૂંકા અંતરનાં મિસાઇલો જેવી જ ચોકસાઈ ધરાવી શકે છે.