30 May, 2026 10:19 AM IST | Beijing | Gujarati Mid-day Correspondent
ઉત્તરીય અષ્ટકોણ બેઝને ચતુરાઈપૂર્વક ૩ સ્તરની ભુલભુલામણી તરીકે ડિઝાઇન કરવામાં આવ્યો છે
ચીનના રણવિસ્તારની તાજેતરની સૅટેલાઇટ તસવીરોએ અમેરિકાને સ્તબ્ધ કરી દીધું છે. રણવિસ્તારમાં ચીન ૩ સ્તરની ન્યુક્લિયર ફૅસિલિટી બનાવી રહ્યું છે જે અમેરિકા માટે ભેદવી અશક્ય હશે. આમ ચીને અમેરિકાનું ગળું દબાવવાની તૈયારીઓ પૂરી કરી લીધી છે. ચીનના નૉર્થ-વેસ્ટ રણમાં હામી ન્યુક્લિયર સિલો ફીલ્ડ નજીક વિશાળ લશ્કરી માળખાનું નિર્માણ થઈ રહ્યું છે. ચીનની પરમાણુ મિસાઇલો હજી પણ કોઈ પણ અમેરિકન શહેરને નિશાન બનાવવાની ક્ષમતા ધરાવે છે. ચીને હવે એની સૌથી લાંબા અંતરની મિસાઇલો ધરાવતા સિલો નજીક ૮૦થી વધુ નવાં કૉન્ક્રીટ લૉન્ચ પૅડ અને બન્કરનું નેટવર્ક બનાવ્યું છે. આ કૉન્ક્રીટ પૅડ એટલાં મોટાં છે કે એનો ઉપયોગ ચીનનાં મોબાઇલ મિસાઇલ લૉન્ચર્સ અને ઍર ડિફેન્સ મિસાઇલ બૅટરીના કાફલા માટે સરળતાથી થઈ શકે છે. આ ઉપરાંત અત્યંત અદ્યતન ઇલેક્ટ્રૉનિક યુદ્ધ અને ઉપગ્રહ સંચાર-સુવિધાઓ પણ ત્યાં સ્પષ્ટપણે જોઈ શકાય છે. આ સમગ્ર રણ નેટવર્કમાં ૩ અષ્ટકોણ આકારના લશ્કરી બેઝ મળી આવ્યા છે, જેમાંથી બે છેલ્લાં ૬ વર્ષમાં પૂર્વીય શિનજિયાંગમાં બનાવવામાં આવ્યા હતા. આમાંથી ઉત્તરીય અષ્ટકોણ બેઝને ચતુરાઈપૂર્વક ૩ સ્તરની ભુલભુલામણી તરીકે ડિઝાઇન કરવામાં આવ્યો છે, જે સુરક્ષા-વિશ્લેષકોને મૂંઝવણમાં મૂકે છે.
