લાડકી બહિણ યોજનામાં મોટું ક્લીન-અપ

૬૫ લાખ અપાત્ર લાભાર્થીઓ ઘટ્યા, હવે વસૂલાતની તૈયારી

પ્રતીકાત્મક તસવીર

મહારાષ્ટ્ર સરકારની મુખ્ય મંત્રી માઝી લાડકી બહિણ યોજનામાં ઇલેક્ટ્રૉનિક નો યૉર કસ્ટમર (e-KYC) પ્રક્રિયા પૂર્ણ થયા બાદ લાભાર્થીઓની સંખ્યામાં મોટો ઘટાડો જોવા મળ્યો છે. ૩૦ એપ્રિલની અંતિમ સમયમર્યાદા બાદ હાથ ધરવામાં આવેલી સઘન ચકાસણીમાં આશરે ૬૫ લાખ મહિલાઓ અપાત્ર ઠરતાં તેમને યાદીમાંથી દૂર કરવામાં આવી છે. યોજનાની શરૂઆતમાં ૨.૪૬ કરોડ મહિલાઓ નોંધાયેલી હતી જે હવે ઘટીને ૧.૮૧ કરોડ થઈ ગઈ છે. નવેમ્બર ૨૦૨૫થી ચાલી રહેલી વેરિફિકેશન પ્રક્રિયા અનેક વાર લંબાવ્યા બાદ ૩૦ એપ્રિલે આખરી કટ-ઑફ ડેટ જાહેર કરવામાં આવી હતી. અપાત્ર લોકો યોજનાનો લાભ લેતા હોવાના અહેવાલો બાદ સરકારે આ કડક વલણ અપનાવ્યું છે.

સરકારી અધિકારીઓના જણાવ્યા અનુસાર હવે પછીનું લક્ષ્ય અપાત્ર લાભાર્થીઓ પાસેથી મેળવેલી સહાયની રકમ વસૂલ કરવાનું રહેશે. 

આ યોજના હેઠળ આર્થિક રીતે નબળા વર્ગની મહિલાઓને દર મહિને ૧૫૦૦ રૂપિયાની સહાય આપવામાં આવે છે. હવે માત્ર સાચા અને પાત્ર લાભાર્થીઓને જ આ નાણાકીય સહાયનો લાભ મળશે.