મહારાષ્ટ્ર: રિક્ષા-ટૅક્સી ચાલકો માટે મરાઠી શીખવાની સમય મર્યાદા સમાપ્ત, હવે શું?

સરકારે જેઓ ભાષા બોલી શકતા ન હતા તેવા ઑટો-રિક્ષા અને ટૅક્સી ડ્રાઇવરો માટે ખાસ મરાઠી ભાષા ટ્રૅનિંગ કૅમ્પસનું આયોજન કર્યું હતું. લગભગ 1.70 લાખ લોકોએ આ તાલીમ માટે અરજી કરી હતી. આમાંથી 1.40 લાખથી વધુ ડ્રાઇવરોએ મરાઠી ભાષાની પરીક્ષા પાસ કરી હતી.

પ્રતીકાત્મક ફાઇલ તસવીર

મહારાષ્ટ્રમાં ઑટો-રિક્ષા અને ટૅક્સી ડ્રાઇવરો મરાઠી બોલી શકે તે માટે સરકારે ખાસ તાલીમ વર્ગો શરૂ કર્યા હતા. ડ્રાઇવરોને ભાષા શીખવા માટે 15 ઑગસ્ટ સુધીની સમયમર્યાદા આપવામાં આવી હતી. આ સમયમર્યાદા હવે પસાર થઈ ગઈ છે, અને આજથી, RTO એવા ડ્રાઇવરો સામે કાર્યવાહી કરશે જેને મરાઠી બોલતા આવડતું નથી. મહારાષ્ટ્ર સરકારના ડેટા અનુસાર, રાજ્યમાં આશરે 25,000 ઑટો-રિક્ષા ડ્રાઇવરોને હજી સુધી મરાઠી ભાષા કૌશલ્ય પ્રમાણપત્ર મળ્યું નથી. તેમાંથી 7,750 ડ્રાઇવરો મરાઠી ભાષા પરીક્ષામાં નાપાસ થયા છે; આ ડ્રાઇવરોએ ફરીથી પરીક્ષા આપવી પડશે.

તાલીમની રાહ જોઈ રહ્યા છે 17,427 ડ્રાઇવરો

પરિવહન વિભાગના એક અધિકારીના જણાવ્યા અનુસાર, 17,427 ડ્રાઇવરો હજી પણ મરાઠી ભાષા તાલીમની રાહ જોઈ રહ્યા છે. આવા ડ્રાઇવરોમાં સૌથી વધુ સંખ્યા મુંબઈના છે. મુંબઈમાં 9,196 ડ્રાઇવરો માટે તાલીમ બાકી છે. વધુમાં, થાણેમાં 4,871, નવી મુંબઈમાં 1,400, પાલઘરમાં 350 અને મહારાષ્ટ્રના બાકીના ભાગમાં 1,610 ડ્રાઇવરો તાલીમની રાહ જોઈ રહ્યા છે.

1.40 લાખથી વધુ ડ્રાઇવરોએ પરીક્ષા પાસ કરી

સરકારે જેઓ ભાષા બોલી શકતા ન હતા તેવા ઑટો-રિક્ષા અને ટૅક્સી ડ્રાઇવરો માટે ખાસ મરાઠી ભાષા ટ્રૅનિંગ કૅમ્પસનું આયોજન કર્યું હતું. લગભગ 1.70 લાખ લોકોએ આ તાલીમ માટે અરજી કરી હતી. આમાંથી 1.40 લાખથી વધુ ડ્રાઇવરોએ મરાઠી ભાષાની પરીક્ષા પાસ કરી હતી. જોકે, 7,750 ડ્રાઇવરો નાપાસ થયા. આ ડ્રાઇવરોએ હવે ફરીથી મરાઠી ભાષાની તાલીમ લેવી પડશે, ત્યારબાદ તેમનો ફરી એકવાર ટૅસ્ટ લેવામાં આવશે. મહારાષ્ટ્રમાં ઑટો-રિક્ષા અને ટૅક્સી ડ્રાઇવરો માટે મરાઠી શીખવું ફરજિયાત બનાવવામાં આવ્યું છે. 15 ઑગસ્ટની સમયમર્યાદા પૂરી થયા બાદ, આરટીઓ નિયમોનું પાલન ન કરનારા ડ્રાઇવરો સામે કાર્યવાહી કરશે.

૨૦ દિવસમાં ટ્રાન્સપોર્ટ ડિપાર્ટમેન્ટે ૧.૬ કરોડ રૂપિયાનો દંડ વસૂલ્યો

રીજનલ ટ્રાન્સપોર્ટ ઑફિસ (RTO), પોલીસ ડિપાર્ટમેન્ટ તથા મહારાષ્ટ્ર સ્ટેટ રોડ ટ્રાન્સપોર્ટ કૉર્પોરેશન (MSRTC) દ્વારા 1 જુલાઈથી 20 જુલાઈ દરમિયાન યોજાયેલી સંયુક્ત કાર્યવાહી દરમિયાન 20 દિવસમાં ગેરકાયદે પાર્ક કરવામાં આવેલાં અથવા પરવાનગી વગર ટ્રાન્સપોર્ટ ઑપરેશન્સ કરનારાં 8839 વાહનો વિરુદ્ધ કાર્યવાહી કરવામાં આવી હતી અને તેમની પાસેથી 1.6 કરોડ રૂપિયાનો દંડ વસૂલવામાં આવ્યો હતો. આ કાર્યવાહી સ્ટેટ ટ્રાન્સપોર્ટ (ST) બસ ડેપો વિસ્તારમાં કરવામાં આવી હતી, જ્યાં પરવાનગી વગર પૅસેન્જર ટ્રાન્સપોર્ટ ઑપરેશન હાથ ધરાતાં હતાં અને ગેરકાયદે વાહનો પાર્ક કરવામાં આવતાં હતાં. આ દરમિયાન 196 વાહનોને જપ્ત પણ કરવામાં આવ્યાં હતાં. ગેરકાયદે પાર્કિંગના કારણે ટ્રાફિકની સમસ્યા ઊભી થતી હોવા ઉપરાંત સિનિયર સિટિઝન્સ, મહિલાઓ અને બાળકોને પણ તકલીફ પડતી હતી. ટ્રાફિકના નિયમોનો ભંગ થતો હોવા ઉપરાંત સુરક્ષાનો પ્રશ્ન ઊભો થતો હોવાથી આ કાર્યવાહી કરવામાં આવી હતી.