13 April, 2026 08:08 AM IST | Mumbai | Gujarati Mid-day Correspondent
પ્રતીકાત્મક તસવીર
રાજ્ય સરકાર દ્વારા ગરીબ મહિલાઓની મદદ કરવા તેમને દર મહિને ‘મુખ્યમંત્રી માઝી લાડકી બહિણ’ યોજના હેઠળ ૧૫૦૦ રૂપિયાની આર્થિક સહાય આપવામાં આવે છે. જોકે યોજનાનો ગેરલાભ અનેક મહિલાઓએ લીધો હોવાનું જણાઈ આવતાં એ માટેના લાભ મેળવવા e-KYC (નો યૉર કસ્ટમર) લાગુ કર્યું છે. જોકે જળગાવમાં એ e-KYC કરી આપવા માટે એક યુવકે મહિલા પાસે શારીરિક સુખની માગણી કરી હોવાની ચોંકાવનારી ઘટના બહાર આવી છે. એટલું જ નહીં, યુવકે અન્ય એક મહિલાને પેન્શન સ્કીમ ફરી ચાલુ કરાવી આપું છું કહીને તેની પાસે પણ પ્રેમસંબંધી માગણી કરી હોવાનું જણાયું છે.
લાડકી બહિણ યોજના માટે e-KYC કરાવવા માગતી યુવતી પાસે જ્યારે એ કરી આપવાના બદલામાં આરોપી યુવકે શારીરિક સુખની માગણી કરી ત્યારે તે ચોંકી ઊઠી હતી અને તેની સામે જળગાંવ સિટી પોલીસ સ્ટેશનમાં ફરિયાદ નોંધાવી હતી. પોલીસે આરોપી યુવક સામે વિનયભંગનો ગુનો દાખલ કરીને તપાસ શરૂ કરી છે.
