એચઆરની પહેલ અને કર્મચારીઓની સહભાગિતાને સફળતા: મિડ-ડેને ‘હેપીએસ્ટ પ્લેસિસ ટુ વર્ક® એવોર્ડ 2026’

કર્મચારી સુખાકારી અને સકારાત્મક કાર્યસંસ્કૃતિ માટે મિડ-ડેને 251થી 500 કર્મચારીઓની શ્રેણીમાં ‘હેપીએસ્ટ પ્લેસિસ ટુ વર્ક એવોર્ડ 2026’ મળ્યો.

એવોર્ડ સ્વીકારનાર મિડ-ડે એચઆર ટીમ

કર્મચારીઓની સુખાકારીને કેન્દ્રમાં રાખતી માનવ સંસાધન વિભાગની વિવિધ પહેલો અને તેમાં કર્મચારીઓની ઉત્સાહભરી સહભાગિતાને કારણે મિડ-ડેએ ‘હેપીએસ્ટ પ્લેસિસ ટુ વર્ક® એવોર્ડ 2026’ મેળવ્યો છે. 251થી 500 કર્મચારીઓ ધરાવતી સંસ્થાઓની શ્રેણીમાં મિડ-ડે વિજેતા બન્યું છે.

મિડ-ડેએ મિડ-સાઇઝ કેટેગરીમાં મેળવ્યું ટોચનું સ્થાન

આ વર્ષે આ પુરસ્કાર માટે 60થી વધુ કંપનીઓએ ભાગ લીધો હતો. કર્મચારીઓની ખુશી અને કાર્યસ્થળની સંસ્કૃતિને સંસ્થાઓ દ્વારા આપવામાં આવી રહેલા વધતા મહત્ત્વને આ વ્યાપક સહભાગિતા દર્શાવે છે. વિજેતાઓની પસંદગી માટે કર્મચારીઓમાં કરાયેલા ખુશી અંગેના સર્વેક્ષણ, સંસ્થાની કાર્યસંસ્કૃતિની સમીક્ષા અને જાહેર મંચો પર મળતા પ્રતિસાદ સહિતનાં વિવિધ પાસાંની ચકાસણી કરવામાં આવી હતી. ખુશી અંગેના સર્વેક્ષણમાં 10માંથી સાત કે તેથી વધુ ગુણ મેળવનારી અને નિયત સમયમર્યાદામાં કાર્યસંસ્કૃતિની સમીક્ષા પૂર્ણ કરનારી કંપનીઓને નિર્ણાયક મંડળના મૂલ્યાંકન માટે પસંદ કરવામાં આવી હતી.

પસંદગી પામેલી કંપનીઓમાંથી કુલ 10 પુરસ્કાર આપવામાં આવ્યા હતા. તેમાં કર્મચારીઓની સંખ્યાના આધારે છ શ્રેણી, 50થી ઓછા, 51થી 100, 101થી 250, 251થી 500, 501થી 1,000 અને 1,000થી વધુ કર્મચારીઓ ધરાવતી સંસ્થાઓ, તેમજ ચાર વિશેષ નિર્ણાયક પુરસ્કારનો સમાવેશ થતો હતો. વિશેષ પુરસ્કારોમાં સૌથી નવીન પહેલ, સૌથી વધુ સર્વસમાવેશક કાર્યસ્થળ, શ્રેષ્ઠ શિક્ષણ અને વિકાસ સંસ્કૃતિ તથા શ્રેષ્ઠ કર્મચારી સન્માન કાર્યક્રમનો સમાવેશ કરવામાં આવ્યો હતો.

કર્મચારીઓ માટેની વિવિધ પહેલની નોંધ લેવાઈ

કર્મચારીઓની સુખાકારી, તેમની કામગીરીની કદર અને સહકર્મચારીઓ વચ્ચેના જોડાણને મજબૂત બનાવવા મિડ-ડે દ્વારા અમલમાં મૂકવામાં આવેલી વિવિધ પહેલોની નિર્ણાયક મંડળે વિશેષ નોંધ લીધી હતી. ‘Inkspire’ અને ‘The Thank Tank’ દ્વારા કર્મચારીઓની સારી કામગીરીની કદર કરવામાં આવે છે, જ્યારે ‘Ad Buzz’ તેમને સર્જનાત્મક પ્રવૃત્તિઓમાં જોડાવાની તક આપે છે. ‘Chai Pe Charcha’ દ્વારા પદ કે હોદ્દાના ભેદ વિના ખુલ્લી રીતે વિચારવિમર્શ કરી શકાય તેવું વાતાવરણ ઊભું કરવામાં આવ્યું છે.

‘Joy of Giving’ પહેલ હેઠળ નિયમિત કર્મચારીઓ ઉપરાંત હાઉસકીપિંગ કર્મચારીઓ અને કરાર આધારિત કામદારોને પણ સહાય અને સંભાળના વર્તુળમાં આવરી લેવામાં આવ્યા છે. આ પહેલ મિડ-ડેની સર્વસમાવેશક કાર્યસંસ્કૃતિ દર્શાવે છે. મહિલા કર્મચારીઓની સુખાકારી માટેના ‘Kehkashan’ અને ‘StrongHer’ કાર્યક્રમો તથા તાલીમાર્થીઓ અને અભ્યાસ પૂર્ણ કરીને કારકિર્દીની શરૂઆત કરતા યુવાનો માટેનો ‘Launchpad’ કાર્યક્રમ પણ નોંધપાત્ર રહ્યા હતા. ‘Launchpad’ હેઠળ નવા જોડાનારાઓને સંસ્થાની કામગીરી અને કાર્યસંસ્કૃતિથી સુવ્યવસ્થિત રીતે પરિચિત કરવામાં આવે છે. આ તમામ કાર્યક્રમોમાં કર્મચારી-કેન્દ્રિત અભિગમ, સતત સંવાદ અને તેના માપી શકાય એવા પરિણામો જોવા મળ્યાં હતાં. અત્યંત સ્પર્ધાત્મક એવી મધ્યમ કદની સંસ્થાઓની શ્રેણીમાં આ બાબતોએ મિડ-ડેને વિશિષ્ટ સ્થાન અપાવ્યું હતું.

હર્ષ ગોયન્કાના અધ્યક્ષપદે નિર્ણાયક મંડળ

પુરસ્કાર માટેના નિર્ણાયક મંડળના અધ્યક્ષ આરપીજી ગ્રુપના ચેરમેન હર્ષ ગોયન્કા હતા. મંડળમાં માનવ સંસાધન અને ઉદ્યોગજગતના નીચેના અગ્રણીઓનો સમાવેશ થયો હતો:

* અચલ ખન્ના — સીઈઓ, એસએચઆરએમ ઇન્ડિયા, એશિયા-પેસિફિક, મધ્ય પૂર્વ અને ઉત્તર આફ્રિકા
* હરિત નાગપાલ — મેનેજિંગ ડિરેક્ટર અને સીઈઓ, ટાટા પ્લે
* પવિત્રા સિંહ — મુખ્ય માનવ સંસાધન અધિકારી અને વાઇસ પ્રેસિડેન્ટ, પેપ્સિકો ઇન્ડિયા અને દક્ષિણ એશિયા
* નીતુ ભૂષણ — માનવ સંસાધન નિયામક, નેસ્લે દક્ષિણ એશિયા
* પુષ્પ કુમાર નાયર — માનવ સંસાધન નિયામક, બીપીસીએલ
* સુનીતા ચેરિયન — વિપ્રોનાં ભૂતપૂર્વ મુખ્ય સંસ્કૃતિ અધિકારી અને વરિષ્ઠ ઉપપ્રમુખ, કોર્પોરેટ માનવ સંસાધન
* ડૉ. પ્રજ્જલ સાહા — સ્થાપક અને મુખ્ય સંપાદક, એચઆર કથા
* રાજ નાયક — સ્થાપક અને મેનેજિંગ ડિરેક્ટર, હાઉસ ઑફ ચીયર અને હેપીએસ્ટ પ્લેસિસ ટુ વર્ક

આ સિદ્ધિ માનવ સંસાધન વિભાગની વિચારપૂર્વક ઘડાયેલી પહેલોની સાથે તેમાં ઉત્સાહપૂર્વક જોડાયેલા સમગ્ર મિડ-ડે પરિવારની પણ જીત છે.