પાલઘરની આશ્રમ શાળામાં ૭ વર્ષના વિદ્યાર્થીનું મોત, ૨૬ વિદ્યાર્થીઓ હોસ્પિટલમાં દાખલ

Palghar: મહારાષ્ટ્રના પાલઘર જિલ્લાના મસવાણ સ્થિત એક નિવાસી આશ્રમ શાળાના ધોરણ ૧ ના વિદ્યાર્થીનું સખત તાવ અને શ્વાસ લેવામાં તકલીફ પડવાને કારણે મોત; શરદી તથા હળવા તાવના લક્ષણો ધરાવતા અન્ય ૨૬ વિદ્યાર્થીઓને હોસ્પિટલમાં દાખલ કરાયા

પ્રતીકાત્મક ફાઇલ તસવીર

મહારાષ્ટ્ર (Maharashtra) ના પાલઘર (Palghar) જિલ્લાની એક સરકારી સહાયક નિવાસી (આશ્રમ) શાળાના ૭ વર્ષના ધોરણ ૧ ના વિદ્યાર્થીનું સખત તાવ અને શ્વાસ લેવામાં તકલીફ પડવાને કારણે મોત નીપજ્યું છે, જ્યારે સમાન લક્ષણો ધરાવતા અન્ય ૨૬ વિદ્યાર્થીઓને હોસ્પિટલમાં દાખલ કરવામાં આવ્યા છે. આ દુખદ ઘટના પાલઘરના મસવાણ (Maswan) વિસ્તારમાં આવેલી સરકારી સહાયક આશ્રમ શાળામાં બની હતી, જે બાદ સ્થાનિક સત્તાવાળાઓએ કેમ્પસમાં વ્યાપક આરોગ્ય તપાસ અને સ્વચ્છતા અભિયાન શરૂ કર્યું છે.

બાળકના ઓક્સિજન સ્તરમાં ઝડપી ઘટાડો નોંધાયો

આરોગ્ય અધિકારીઓના જણાવ્યા અનુસાર, ૭ વર્ષના આ બાળકને શનિવાર, ૨૨ ઓગસ્ટે સૌપ્રથમ સખત તાવ આવ્યો હતો અને મસવાણના સ્થાનિક પ્રાથમિક આરોગ્ય કેન્દ્ર (Primary Health Centre) ખાતે પ્રાથમિક સારવાર આપવામાં આવી હતી. જોકે, સોમવારે તાવ ફરી ઊથલો મારતાં તેની તબિયત વધુ બગડી હતી.

પ્રાથમિક આરોગ્ય કેન્દ્ર (PHC) ના મેડિકલ ઓફિસરે બાળકના બ્લડ ઓક્સિજનના સ્તરમાં તીવ્ર ઘટાડો અને શ્વાસ લેવામાં ગંભીર તકલીફ નોંધતાં તેને તાત્કાલિક એમ્બ્યુલન્સ મારફતે મનોર (Manor) સ્થિત ગ્રામીણ હોસ્પિટલમાં ખસેડવામાં આવ્યો હતો. મનોર હોસ્પિટલ પહોંચતા જ ડોક્ટરોએ ઈસીજી (ECG) કર્યા બાદ બાળકને મૃત જાહેર કર્યો હતો. અધિકારીઓએ જણાવ્યું હતું કે પોસ્ટમોર્ટમ રિપોર્ટ આવ્યા બાદ જ મોતનું સાચું કારણ સ્પષ્ટ થશે.

સાવચેતીના ભાગરૂપે ૨૬ વિદ્યાર્થીઓ હોસ્પિટલમાં દાખલ

આ ઘટના બાદ વરિષ્ઠ વહીવટી અને જાહેર આરોગ્ય અધિકારીઓ નિવાસી શાળા સંકુલની મુલાકાતે દોડી ગયા હતા. આ શાળામાં કુલ ૪૪૯ નોંધાયેલા વિદ્યાર્થીઓમાંથી ૩૯૫ વિદ્યાર્થીઓ હોસ્ટેલમાં રહે છે. એક વિશેષ મેડિકલ ટીમે તમામ વિદ્યાર્થીઓની સંપૂર્ણ આરોગ્ય તપાસ કરી હતી.

આરોગ્ય તપાસ દરમિયાન શરદી, ઉધરસ અથવા હળવા તાવના લક્ષણો ધરાવતા ૨૬ વિદ્યાર્થીઓને સાવચેતીના ભાગરૂપે તાત્કાલિક મસવાણ પ્રાથમિક આરોગ્ય કેન્દ્ર (Maswan PHC)માં ખસેડાયા હતા. મેડિકલ ઓફિસરોએ પુષ્ટિ કરી છે કે, પાણીજન્ય કે વાહકજન્ય (મચ્છરજન્ય) રોગચાળાની શક્યતા ચકાસવા માટે દાખલ કરાયેલા બાળકોના બ્લડ સેમ્પલ લેબોરેટરી ટેસ્ટિંગ માટે મોકલવામાં આવ્યા છે. હોસ્પિટલમાં દાખલ તમામ ૨૬ વિદ્યાર્થીઓની હાલત સ્થિર છે અને તેઓ તબીબી દેખરેખ હેઠળ છે.

કેમ્પસમાં સ્વચ્છતા અને જંતુનાશક કામગીરી શરૂ

એકીકૃત આદિવાસી વિકાસ પ્રોજેક્ટના અધિકારી વિશાલ ખત્રી આશ્રમ શાળા પરિસર અને પ્રાથમિક આરોગ્ય કેન્દ્રની મુલાકાત લઈને હોસ્પિટલમાં દાખલ વિદ્યાર્થીઓ અને તેમના પરિવારજનોને મળ્યા હતા. ખત્રીએ જણાવ્યું હતું કે જિલ્લા આરોગ્ય અધિકારીની સલાહ અનુસાર તમામ બાળકોની તપાસ કરવામાં આવી છે.

શાળા પરિસરમાં પીવાનું સ્વચ્છ પાણી સુનિશ્ચિત કરવા અને કોઈપણ સંભવિત રોગચાળો ફેલાતો અટકાવવા માટે પાલિકાના કર્મચારીઓએ સંપૂર્ણ કેમ્પસમાં સેનિટાઈઝેશન, જંતુનાશક દવાનો છંટકાવ અને પાણીના શુદ્ધિકરણની કામગીરી શરૂ કરી દીધી છે. અધિકારીઓએ ઉમેર્યું હતું કે ચોમાસાની ઋતુ દરમિયાન વિદ્યાર્થીઓના આરોગ્યની સુરક્ષા માટે રાજ્યની આવી નિવાસી શિક્ષણ સંસ્થાઓ પર કડક નજર રાખવામાં આવશે.