06 November, 2026 09:37 PM IST | Mumbai | Gujarati Mid-day Online Correspondent
શરદ પવાર (તસવીર: મિડ-ડે)
રાષ્ટ્રવાદી કૉંગ્રેસ પાર્ટી (શરદચંદ્ર પવાર) જૂથના વડા શરદ પવારની તબિયતમાં સુધારો થઈ રહ્યો છે. તેઓ શનિવાર, ૭ નવેમ્બરની સવારે મુંબઈની બ્રીચ કૅન્ડી હૉસ્પિટલમાંથી ડિસ્ચાર્જ મળે તેવી શક્યતા છે. આ માહિતી શુક્રવારે તેમની પુત્રી અને લોકસભા સાંસદ સુપ્રિયા સુળેએ આપી હતી. સમાચાર એજન્સી પીટીઆઈ (PTI) સાથે વાત કરતા તેમણે જણાવ્યું કે, શરદ પવારને સવારે લગભગ ૧૧:૦૦ વાગ્યે હૉસ્પિટલમાંથી રજા આપવામાં આવે તેવી અપેક્ષા છે. સુપ્રિયા સુળેએ જણાવ્યું કે, અનેક રાજકીય નેતાઓએ ફોન કરીને તેમના પિતાના સ્વાસ્થ્ય વિશે પૂછપરછ કરી હતી. આ નેતાઓમાં લોકસભામાં વિરોધ પક્ષના નેતા રાહુલ ગાંધી, મહારાષ્ટ્રના મુખ્ય પ્રધાન દેવેન્દ્ર ફડણવીસ અને તૃણમૂલ કૉંગ્રેસ (TMC)ના વડા મમતા બેનર્જીનો સમાવેશ થાય છે.
૮૫ વર્ષીય શરદ પવારને શ્વાસ લેવામાં તકલીફ અને છાતીમાં ચેપ (ચૅસ્ટ ઇન્ફેક્શન)ને કારણે હૉસ્પિટલમાં દાખલ કરવામાં આવ્યા હતા. તેમને શરૂઆતમાં ૨ નવેમ્બરે પુણેની રૂબી હૉલ ક્લિનિકમાં દાખલ કરવામાં આવ્યા હતા. ત્યાંથી ૪ નવેમ્બરે રજા મળ્યા બાદ, વધુ સારવાર માટે તેમને મુંબઈની બ્રીચ કૅન્ડી હૉસ્પિટલમાં દાખલ કરવામાં આવ્યા હતા. સુપ્રિયા સુળેએ અગાઉ જણાવ્યું હતું કે તેમના પિતાની તબીબી તપાસ ચાલી રહી છે અને તેમના સ્વાસ્થ્યના તમામ રિપોર્ટ્સ સ્થિર છે.
વિવિધ રાજકીય પક્ષોના નેતાઓએ શરદ પવારની તબિયત જાણવા માટે સુપ્રિયા સુળેનો સંપર્ક કર્યો હતો. રાહુલ ગાંધી, દેવેન્દ્ર ફડણવીસ અને મમતા બેનર્જીએ ફોન પર તેમની સાથે વાત કરીને શરદ પવારના સ્વાસ્થ્ય વિશે પૂછપરછ કરી હતી. બુધવારે વડા પ્રધાન નરેન્દ્ર મોદીએ પણ શરદ પવારને ફોન કર્યો હતો. પવારના પારિવારિક મિત્ર અને નજીકના સહયોગી વિઠ્ઠલ મનિયારે હૉસ્પિટલની બહાર પત્રકારો સાથે વાત કરતી વખતે આ ફોન કૉલની પુષ્ટિ કરી હતી. તેમણે જણાવ્યું કે, વડા પ્રધાન મોદીએ શરદ પવારને તેમના સ્વાસ્થ્યને પ્રાથમિકતા આપવા અને પૂરતો આરામ કરવાની સલાહ આપી હતી.
દરમિયાન, શુક્રવાર, ૬ નવેમ્બરના રોજ અદાણી ગ્રુપના ચૅરમૅન ગૌતમ અદાણીએ શરદ પવારને મળવા માટે બ્રીચ કૅન્ડી હૉસ્પિટલની મુલાકાત લીધી હતી. આ પહેલા ગુરુવારે, એનસીપી (NCP) નેતા પ્રફુલ્લ પટેલે પણ હૉસ્પિટલ જઈને શરદ પવાર સાથે મુલાકાત કરી હતી અને તેમના સ્વાસ્થ્ય વિશે પૂછપરછ કરી હતી. આ મુલાકાત બાદ પ્રફુલ્લ પટેલે જણાવ્યું, "મેં મુંબઈની બ્રીચ કૅન્ડી હૉસ્પિટલની મુલાકાત લીધી હતી, જેથી આદરણીય શરદ પવારજીને મળી શકું અને તેમના સ્વાસ્થ્યના ખબરઅંતર પૂછી શકું." જો ડૉક્ટરો તેમને હૉસ્પિટલમાંથી રજા આપવાની મંજૂરી આપે, તો શરદ પવાર શનિવારે સવારે હૉસ્પિટલમાંથી ઘરે પરત ફરી શકે છે.
