હવે થાણેના બિઝનેસમૅનને બિશ્નોઈ ગૅન્ગના નામે ધમકી મળી

લૉરેન્સ બિશ્નોઈ

સેલિબ્રિટીઝને ધમકી મળ્યા બાદ બિઝનેસમેન, બિલ્ડરો અને રાજકારણીઓને લૉરેન્સ બિશ્નોઈ ગૅન્ગના નામે ધમકી મળવાની ફરિયાદ વધી ગઈ છે. બિશ્નોઈ ગૅન્ગનો સભ્ય હોવાનું કહીને થાણેના એક પ્રખ્યાત બિલ્ડર પાસેથી ૧૦ કરોડ રૂપિયા પડાવવાનો પ્રયાસ કરવા બદલ અજાણી વ્યક્તિ સામે ગુનો નોંધવામાં આવ્યો છે.

૬૦ વર્ષના બિઝનેસમૅને નૌપાડા પોલીસ-સ્ટેશનમાં નોંધાવેલી ફરિયાદ મુજબ ૧૧ ફેબ્રુઆરીએ જ્યારે તેઓ મધ્ય પ્રદેશમાં એક ધાર્મિક કાર્યક્રમમાં ગયા હતા ત્યારે તેમને ઉપરાઉપરી વૉટ્સઍપ કૉલ આવ્યા હતા અને ૧૦ કરોડ રૂપિયા નહીં આપે તો મારવાની ધમકી આપવામાં આવી હતી. એટલું જ નહીં, ધમકી આપનારે કૉલ રેકૉર્ડ કરીને પોલીસને આપે તો એના માટે પણ તેઓ તૈયાર છે એવી દાદાગીરી પણ બતાવી હતી.

નૌપાડા પોલીસ-સ્ટેશનના સિનિયર ઇન્સ્પેક્ટર અભય મહાજને જણાવ્યું હતું કે ઉદ્યોગપતિની ફરિયાદ, વૉટ્સઍપ કૉલ્સ અને ઑડિયો-ક્લિપ્સના આધારે અજાણી વ્યક્તિ સામે ફરિયાદ નોંધી છે. આ કેસમાં કોઈ ધરપકડ કરવામાં આવી નથી.