અટલ સેતુ પરથી પસાર થનારાં વ્હીકલની સંખ્યા બે કરોડને પાર

૨,૦૦,૦૦,૦૦૦માંથી ૧,૮૧,૯૫,૭૧૮ પ્રાઇવેટ વ્હીકલ પસાર થયાં

અટલ સેતુ

ભારતનો સૌથી લાંબો દરિયાઈ પુલ અટલ સેતુ લોકાર્પણના ટૂંકા ગાળામાં જ ભારે લોકપ્રિય સાબિત થયો છે. ૨૦૨૪ના જાન્યુઆરીમાં એના ઉદ્ઘાટનથી અત્યાર સુધીમાં આ પુલ પરથી બે કરોડથી વધુ વાહનો પસાર થયાં છે.

મુંબઈ મેટ્રોપૉલિટન રીજન ડેવલપમેન્ટ ઑથોરિટી (MMRDA)એ સોશ્યલ મીડિયા પ્લૅટફૉર્મ પર આ માહિતી શૅર કરતાં જણાવ્યું હતું કે ‘૨૭ માર્ચે અટલ સેતુ પરથી ૨,૦૦,૦૦,૩૧૬મા વાહને પસાર થઈને આ ઐતિહાસિક આંકડો પૂરો કર્યો હતો. આ આંકડો મુંબઈ મેટ્રોપૉલિટન રીજનમાં એક મહત્ત્વપૂર્ણ કનેક્ટર તરીકે અટલ સેતુની વધતી જતી ઉપયોગિતા દર્શાવે છે.’

MMRDAના ડેટા મુજબ આ પુલનો સૌથી વધુ ઉપયોગ પ્રાઇવેટ વ્હીકલ્સ દ્વારા કરવામાં આવી રહ્યો છે. કુલ વ્હીકલમાં ૯૧ ટકા એટલે કે અંદાજે ૧,૮૧,૯૫,૭૧૮ પ્રાઇવેટ વ્હીકલ આ પુલ પરથી પસાર થયાં હતાં. આ ઉપરાંત લાઇટ કમર્શિયલ વ્હીકલ, મિની બસ અને મોટી બસોની સંખ્યા ૫,૯૮,૫૨૫ નોંધાઈ છે. મધ્યમ, ભારે અને ઓવરસાઇઝ્ડ વાહનોના કિસ્સામાં ૧૨,૦૬,૦૭૩ વાહનો નોંધાયાં છે.