12 July, 2026 06:44 PM IST | Nalbari | Gujarati Mid-day Online Correspondent
હિમંતા બિસ્વા સરમા (સૌજન્ય મિડડે)
આસામના નળબારી જિલ્લાના દૌલાસાલમાં 14મી આસામ પોલીસ બટાલિયનના મુખ્યાલય ખાતે એક મોટા કાર્યક્રમનું આયોજન કરવામાં આવ્યું હતું. આ કાર્યક્રમ દરમિયાન પોલીસે જપ્ત કરેલી 472 કરોડ રૂપિયાથી વધુ કિંમતની ડ્રગ્સ નષ્ટ કર્યું હતું. આ પ્રસંગે આસામના મુખ્યમંત્રી ડૉ. હિમંત બિસ્વા સરમા પણ હાજર રહ્યા હતા. પોલીસે જપ્ત કરાયેલા નશીલા પદાર્થોને આગ લગાવીને નષ્ટ કર્યા હતા. મુખ્યમંત્રીએ કહ્યું કે આ માત્ર એક કાર્યવાહી નથી, પરંતુ આસામને નશાના જાળમાંથી બહાર લાવવાની મોટી લડાઈનો એક ભાગ છે.
CM હિમંત બિસ્વા સરમાએ કહ્યું કે નશાના રૅકેટને સંપૂર્ણ રીતે ખતમ કરવા માટે પોલીસને પોતાની માહિતી એકત્ર કરવાની અને તપાસ કરવાની ક્ષમતા વધુ મજબૂત બનાવવી પડશે. તેમણે કહ્યું કે માત્ર નાના સ્તરના તસ્કરો સામે નહીં પરંતુ મોટા સપ્લાયરો અને મુખ્ય લોકો સુધી પહોંચીને કાર્યવાહી કરવી જરૂરી છે. મુખ્યમંત્રીએ આસામ, મણિપુર, મિઝોરમ અને પશ્ચિમ બંગાળ જેવી સરકારો સાથે મળીને કામ કરે તો નશીલા પદાર્થોની તસ્કરીને રોકી શકાય છે અને મોટા તસ્કરોને જેલ સુધી પહોંચાડી શકાય છે.
હિમંત બિસ્વા સરમાએ કહ્યું કે પહેલીવાર એવું જોવા મળી રહ્યું છે કે નશાના રૅકેટ સામે કાર્યવાહી કરવા માટે વિપક્ષી પાર્ટીઓ પણ સરકાર સાથે ઉભી છે. તેમણે કહ્યું કે જો આવો સહયોગ પાંચ વર્ષ પહેલાં મળ્યો હોત તો આજે રાજ્યની સ્થિતિ વધુ સારી હોત. તેમણે લોકોને સાથે મળીને કામ કરવાની અપીલ કરતા કહ્યું કે એકતા સાથે પ્રયાસ કરવામાં આવે તો સારા પરિણામ મળી શકે છે.
મુખ્યમંત્રીએ યુવાનોમાં વધતા નશાના પ્રભાવ અંગે ચિંતા વ્યક્ત કરી હતી. તેમણે કહ્યું કે ડ્રગ્સ માત્ર વ્યક્તિના સ્વાસ્થ્યને નુકસાન પહોંચાડતું નથી, પરંતુ સમગ્ર સમાજને પણ અસર કરે છે. સરકાર અને પોલીસ હવે નશાના સમગ્ર નૅટવર્કને તોડવા માટે કામ કરી રહી છે. અધિકારીઓને મોટા તસ્કરો પર નજર રાખવા અને તેમની સામે કડક કાર્યવાહી કરવા સૂચના આપવામાં આવી છે.
છેલ્લા કેટલાક સમયથી આસામ પોલીસ નશીલા પદાર્થો સામે સતત અભિયાન ચલાવી રહી છે. આ દરમિયાન અનેક તસ્કરોની ધરપકડ કરવામાં આવી છે અને તેમની સંપત્તિ પણ જપ્ત કરવામાં આવી છે. 472 કરોડ રૂપિયાથી વધુની ડ્રગ્સ નષ્ટ કરવાની કાર્યવાહી આ અભિયાનની મોટી સફળતા માનવામાં આવી રહી છે. CM હિમંત બિસ્વા સરમાના નિવેદનથી સ્પષ્ટ છે કે આસામ સરકાર રાજ્યમાં નશાના રૅકેટને રોકવા માટે વધુ કડક પગલાં લેવાના મૂડમાં છે. યુવાનોને નશાથી દૂર રાખવા અને સ્વસ્થ સમાજ બનાવવાની દિશામાં આ પગલું મહત્વપૂર્ણ માનવામાં આવી રહ્યું છે.
