૪૦૫ વિદેશી સંરક્ષણસાધનોની આયાત પર પ્રતિબંધ

આત્મનિર્ભર ભારત અભિયાન હેઠળ દેશના સ્થાનિક ઉદ્યોગોને ૩૦૭૦ કરોડના નવા ઑર્ડર આપવામાં આવશે

પ્રતીકાત્મક તસવીર (તસવીર સૌજન્યઃ એઆઇ)

ભારત સરકારે સ્થાનિક ઉત્પાદનને પ્રોત્સાહન આપવા માટે અત્યંત મહત્ત્વનો નિર્ણય લઈને ૪૦૫ સંરક્ષણસાધનોની વિદેશી આયાત પર સત્તાવાર રીતે તબક્કાવાર પ્રતિબંધ લગાવી દીધો છે. ડિપાર્ટમેન્ટ ઑફ ડિફેન્સ પ્રોડક્શન (DDP) દ્વારા આ તમામ હથિયારોની યાદી સત્તાવાર રીતે જાહેર કરવામાં આવી છે.

હવેથી ૩૦૭૦ કરોડ રૂપિયાનાં આ તમામ સંરક્ષણ-ઉપકરણો માત્ર દેશમાં જ માઇક્રો સ્મૉલ ઍન્ડ મીડિયમ એન્ટરપ્રાઇઝિસ (MSME) અને સ્થાનિક કંપનીઓ પાસેથી ખરીદવામાં આવશે. આ નવી યાદીમાં ઇન્ડિયન કોસ્ટ ગાર્ડ (ICG) માટેનાં ૧૬ અને ડિફેન્સ પબ્લિક સેક્ટર અન્ડરટેકિંગ્સ (DPSU) માટેનાં ૩૮૯ સાધનોનો સમાવેશ સત્તાવાર રીતે થાય છે.

આ સાધનોમાં ઍડ્‌વાન્સ્ડ લાઇટ હેલિકૉપ્ટર, સુખોઈ વિમાન, T72 ટૅન્ક, અત્યાધુનિક રડાર અને મિસાઇલ સિસ્ટમ જેવી અત્યંત મહત્ત્વની વસ્તુઓ સામેલ છે.

આત્મનિર્ભર સંરક્ષણક્ષેત્ર

દેશના સંરક્ષણક્ષેત્રને આત્મનિર્ભર બનાવવા માટે શરૂ કરવામાં આવેલા સૃજન ડિફેન્સ પોર્ટલ મારફત અત્યાર સુધીમાં ૧૫,૭૦૦થી વધુ સાધનોનું દેશમાં સફળતાપૂર્વક ઉત્પાદન થઈ ચૂક્યું છે. માર્ચ ૨૦૨૬ના અંત સુધીમાં સ્થાનિક ઉત્પાદકોને આશરે ૧૦,૦૦૦ કરોડ રૂપિયાના ઑર્ડર અપાયા છે.