ઘરેલુ LPG અને પેટ્રોલ-ડીઝલના ભાવવધારા માટે પણ તૈયાર રહેજો

સરકારી સૂત્રોના કહેવા મુજબ આગામી પાંચ-સાત દિવસમાં ફ્યુઅલના ભાવમાં ચાર-પાંચ રૂપિયા પ્રતિ લીટર અને LPGમાં ૪૦થી ૫૦ રૂપિયા ભાવ વધી શકે છે

ફાઇલ તસવીર

વેસ્ટ એશિયાના યુદ્ધને કારણે દુનિયાભરમાં કાચા તેલની કિંમતમાં તેજ ઉછાળો આવ્યો છે. એને કારણે પેટ્રોલ-ડીઝલ તેમ જ ઘરેલુ LPGના ભાવમાં પણ વધારો થઈ શકે છે. સરકારનાં ટોચનાં સૂત્રોનું કહેવું છે કે કાચા તેલના ભાવ જે હદે વધ્યા છે એ જોતાં સરકારે ફ્યુઅલમાં ભાવવધારો કરવો જ પડશે. પેટ્રોલ-ડીઝલના ભાવમાં ચારથી પાંચ રૂપિયાનો અને ઘરેલુ LPG સિલિન્ડરના ભાવમાં ૪૦થી ૫૦ રૂપિયાનો વધારો થઈ શકે છે. જો આ માટેની મંજૂરી કૅબિનેટની બેઠકમાં મળી જાય તો છેલ્લાં ૪ વર્ષમાં પેટ્રોલ અને ડીઝલની કિંમતમાં પહેલી વારનો વધારો હશે. ૨૦૨૨થી રીટેલ ફ્યુઅલના ભાવ ઘણા અંશે સ્થિર રહ્યા છે. છેલ્લા કેટલાક સમયથી રીટેલ ફ્યુઅલના ભાવમાં કોઈ વધારો ન થવાથી અત્યારે ઑઇલ કંપનીઓ નુકસાન ઉઠાવી રહી છે.

સૂત્રોના કહેવા મુજબ ગ્લોબલ એનર્જી માર્કેટમાં ઊભી થયેલી નાજુક હાલતને કારણે હજી સુધી કોઈ ફાઇનલ નિર્ણય નથી લેવાયો, પરંતુ આગામી પાંચ-સાત દિવસમાં જ ભાવવધારાને લઈને નિર્ણય લેવાઈ જશે. 

હું કહેતો જ હતો કે ચૂંટણી પછી મોંઘવારી આવશે : રાહુલ ગાંધી

કેન્દ્ર સરકારે પહેલી મેથી જ કમર્શિયલ સિલિન્ડરના ભાવમાં ભારે વધારો ઝીંકતાં વિરોધ પક્ષના નેતા રાહુલ ગાંધીએ સોશ્યલ મીડિયા પર કડક વિરોધ કરતાં લખ્યું હતું કે ‘આ પણ ચૂંટણી બિલ જ છે. હવે નેક્સ્ટ માર પેટ્રોલ અને ડીઝલ પર પડશે. મેં પહેલાં જ ચેતવણી આપી હતી કે ચૂંટણી પછી મોંઘવારીનો માર પડશે. એક દિવસમાં આ સૌથી મોટો ભાવવધારો છે. ફેબ્રુઆરીથી અત્યાર સુધીમાં ૧૩૮૦ રૂપિયાનો વધારો થયો. મતલબ કે ૩ મહિનામાં ૮૧ ટકા ભાવવધારો થયો. પહેલો વાર ગૅસ પર, હવે આગળનો વાર પેટ્રોલ-ડીઝલ પર.’