મુસલમાનોને નિશાન બનાવવામાં આવી રહ્યા છે, જ્યારે પણ જુલમ થશે ત્યારે જેહાદ થશે

જમિયત ઉલેમા-એ-હિન્દની ગવર્નિંગ બૉડીની બેઠકમાં મૌલાના મહમૂદ મદનીનું ઉશ્કેરણીજનક ભાષણ

મૌલાના મહમૂદ મદની

ભોપાલમાં જમિયત ઉલેમા-એ-હિન્દની ગવર્નિંગ બૉડીની બેઠકમાં બોલતાં એના વડા મૌલાના મહમૂદ મદનીએ ગઈ કાલે કહ્યું હતું કે ‘વર્તમાન યુગમાં ઇસ્લામ અને મુસ્લિમો સામે નફરત ફેલાવવાના પ્રયાસો વધ્યા છે. પવિત્ર શબ્દ જેહાદને જાણી જોઈને આતંકવાદ અને હિંસા સાથે જોડવામાં આવી રહ્યો છે. લવ જેહાદ, લૅન્ડ જેહાદ અને થૂંક જેહાદ જેવા શબ્દો મુસ્લિમોને બદનામ કરવા માટે બનાવવામાં આવ્યા છે. ઇસ્લામમાં જેહાદનો અર્થ અન્યાય અને જુલમ સામે સંઘર્ષ છે. જ્યારે પણ જુલમ થશે ત્યારે જેહાદ થશે.’

મૌલાના મહમૂદ મદનીએ આરોપ લગાવ્યો હતો કે ‘મુસ્લિમોને સતત નિશાન બનાવવામાં આવી રહ્યા છે અને તેમના ધાર્મિક પોશાક, ઓળખ અને જીવનશૈલી પર સવાલ ઉઠાવવામાં આવી રહ્યા છે. મુસ્લિમો આ દેશના સમાન નાગરિક છે; પરંતુ શિક્ષણ, રોજગાર અને સામાજિક સમાનતાના તેમના અધિકારોને પાયાના સ્તરે નબળા પાડવામાં આવી રહ્યા છે.’

મદનીએ બીજું શું કહ્યું?
 અદાલતો નિષ્પક્ષ હોવી જોઈએ, પરંતુ કેટલાક ચુકાદાઓએ શંકા ઊભી કરી છે. સુપ્રીમ કોર્ટ ત્યારે જ ખરેખર સર્વોચ્ચ બનશે જ્યારે એ બંધારણનો સંપૂર્ણ અમલ કરશે. દેશની વસ્તીનો એક મોટો ભાગ આજે પણ મૌન છે. જો આ વર્ગ નફરત ફેલાવનારાની તરફ ગયો તો એ દેશ માટે ખતરો બની શકે છે. મુસ્લિમોને અસુરક્ષિત મહેસૂસ કરાવવામાં આવી રહ્યા છે. તેમની સામે બુલડોઝર કાર્યવાહી, મૉબ-લિન્ચિંગ, આર્થિક બહિષ્કાર અને નફરતનું વાતાવરણ બનાવવામાં આવી રહ્યું છે. ધર્માંતરણ કાયદાઓ દ્વારા મુસ્લિમોની દાવત અને તાલીમને અપરાધ બનાવવામાં આવ્યો છે, જ્યારે કેટલાંક સંગઠનોને સ્વતંત્ર લગામ છે. વક્ફ મુસ્લિમોની અમાનત છે અને આ મિલકતોમાં દખલગીરી સહન કરવામાં આવશે નહીં.

આ નિવેદન વિભાજનકારી : સંબિત પાત્રા
જમિયત ઉલેમા-એ-હિન્દના વડા મૌલાના મહમૂદ મદનીના નિવેદનોના મુદ્દે પ્રતિક્રિયા આપતાં ભારતીય જનતા પાર્ટી (BJP)ના પ્રવક્તા સંબિત પાત્રાએ કહ્યું હતું કે ‘ભોપાલમાં મૌલાનાનું નિવેદન ઉશ્કેરણીજનક અને વિભાજનકારી છે. આપણે જોયું છે કે કેવી રીતે લોકોએ જેહાદના નામે માત્ર ભારતમાં જ નહીં પરંતુ બહાર પણ આતંક ફેલાવ્યો છે. મદનીએ કહ્યું છે કે સુપ્રીમ કોર્ટને સુપ્રીમ કહેવાનો કોઈ અધિકાર નથી. સુપ્રીમ કોર્ટે મૌલાના મદનીના નિવેદનની સામે ચાલીને નોંધ લેવી જોઈએ અને કેસની સુનાવણી કરવી જોઈએ.’

કઠિન તાલીમ પછી તૈયાર છે ૩૫૩ અગ્નિવીરો

વારાણસીમાં ૩૯ ગોરખા ટ્રેઇનિંગ સેન્ટરમાં અગ્નિવીરોની તાલીમ પૂરી થઈ છે. ૩૫૩ અગ્નિવીરોનો છઠ્ઠો બૅચ ૩૧ અઠવાડિયાંની કઠિન તાલીમ બાદ ઉત્તીર્ણ થયો હતો. શનિવારે વારાણસીના પરેડ ગ્રાઉન્ડમાં આ વીરોએ મા ભારતીની સેવા કરવાના સોગંદ લીધા હતા.