કર્ણાટકમાં હવે ફિલ્મ-ટિકિટની કિંમત ૨૦૦ રૂપિયાથી વધારે નહીં રાખી શકાય

બૅન્ગલોરમાં મંગળવારે રાત્રે સરકારે જાહેરાત કરી કે હવે કર્ણાટકના કોઈ પણ થિયેટરમાં ફિલ્મની ટિકિટ ૨૦૦ રૂપિયાથી વધુ નહીં હોય

કર્ણાટક મલ્ટિપ્લેક્સ

કર્ણાટક સરકારે મલ્ટિપ્લેક્સ અને સિંગલ સ્ક્રીન થિયેટરોમાં ટિકિટની મહત્તમ કિંમત ૨૦૦ રૂપિયા નક્કી કરી છે. આ નીતિ ખાસ કરીને કન્નડા ફિલ્મોને પ્રોત્સાહન આપવા અને દર્શકોને રાહત આપવા માટે લાગુ કરવામાં આવી છે. દક્ષિણ ભારતનાં અનેક રાજ્યોએ પહેલાંથી જ મૂવી-ટિકિટોની મહત્તમ સીમા નક્કી કરી રાખી છે.

બૅન્ગલોરમાં મંગળવારે રાત્રે સરકારે જાહેરાત કરી કે હવે કર્ણાટકના કોઈ પણ થિયેટરમાં ફિલ્મની ટિકિટ ૨૦૦ રૂપિયાથી વધુ નહીં હોય. આ રકમમાં એન્ટરટેઇનમેન્ટ ટૅક્સનો પણ સમાવેશ થઈ જાય છે.

કર્ણાટકના મુખ્ય પ્રધાન સિદ્ધારામૈયાએ આ વર્ષે બજેટ-ભાષણમાં ટિકિટોના ભાવની મહત્તમ સીમા નક્કી કરવાનું વચન આપ્યું હતું, જે હવે ઔપચારિક રીતે લાગુ થયું છે. આ નવા નિયમનો સીધો ફાયદો મધ્યમવર્ગીય દર્શકોને મળશે, કારણ કે અત્યાર સુધી તેઓ મલ્ટિપ્લેક્સની ઊંચી કિંમતોને કારણે ફિલ્મ જોવાનું ટાળતા હતા. કર્ણાટકમાં આ નિયમ લાગુ થયો એ અગાઉ પ્રીમિયમ શોની ટિકિટો ૫૦૦ રૂપિયાથી માંડીને ૧૦૦૦ રૂપિયા સુધી પહોંચી જતી હતી. આ નિયમ તાત્કાલિક અસરથી લાગુ થયો છે અને થિયેટરો માટે આ નિયમનું પાલન કરવું ફરજિયાત છે.