04 November, 2026 04:21 PM IST | New Delhi | Gujarati Mid-day Online Correspondent
શરદ પવાર અને નરેન્દ્ર મોદી
વડા પ્રધાન નરેન્દ્ર મોદીએ બુધવારે સવારે રાષ્ટ્રવાદી કૉંગ્રેસ પાર્ટી શરદચંદ્ર પવાર જૂથના અધ્યક્ષ શરદ પવારને ફોન કરીને તેમની તબિયત પૂછી હતી. વાતચીત દરમિયાન, વડા પ્રધાન મોદીએ ૮૫ વર્ષીય નેતાને સંપૂર્ણ આરામ કરવાની સલાહ આપી હતી. તેમણે કહ્યું કે પવારના દીકરી અને બારામતીના સાંસદ સુપ્રિયા સુળે સંપૂર્ણ રીતે સક્ષમ છે, અને તેઓ તથા અન્ય લોકો દેશની જવાબદારીઓ સંભાળી લેશે. આ માહિતી શરદ પવારના નજીકના સહયોગી વિઠ્ઠલ મણિયારે બુધવારે પત્રકારો સાથે વાત કરતી વખતે આપી હતી. તેમણે જણાવ્યું કે વડા પ્રધાને સવારે વહેલા ફોન કરીને પવારની તબિયત પૂછી હતી. મણિયારના જણાવ્યા અનુસાર, બન્ને નેતાઓ વચ્ચેની વાતચીત ખૂબ જ સૌહાર્દપૂર્ણ અને આદરપૂર્ણ રહી હતી.
વિઠ્ઠલ મણિયારે જણાવ્યું કે વડા પ્રધાન નરેન્દ્ર મોદીએ શરદ પવારને કહ્યું, "સાહેબ, કૃપા કરીને સંપૂર્ણ આરામ કરો. સુપ્રિયા તૈયાર છે. તે અને અમે બધા મળીને દેશના કામકાજ સંભાળી લઈશું; તેથી, હું તમને આરામ કરવાની વિનંતી કરું છું." મણિયારે વધુમાં જણાવ્યું કે, તેના જવાબમાં શરદ પવારે કહ્યું કે તેઓ પહેલેથી જ આરામ કરી રહ્યા છે અને દેશની ચિંતા કરવાની કોઈ જરૂર નથી. પવારે કહ્યું, "હું આરામ કરી રહ્યો છું, અને તમે બધા ત્યાં છો, તેથી મને દેશ અંગે કોઈ ચિંતા નથી. તમે તમારું સારું કામ ચાલુ રાખો." વિઠ્ઠલ મણિયારના જણાવ્યા અનુસાર, શરદ પવારે તેમનો સંપર્ક કરવા અને સ્વાસ્થ્ય વિશે પૂછપરછ કરવા બદલ વડા પ્રધાનનો આભાર પણ માન્યો હતો.
૮૫ વર્ષીય શરદ પવારને ૨ નવેમ્બરના રોજ પુણેની રૂબી હૉલ ક્લિનિકમાં દાખલ કરવામાં આવ્યા હતા. તેમને ઉધરસ અને `પ્લ્યુરિટિક પેઈન`ની ફરિયાદ હતી. હૉસ્પિટલમાં રોકાણ દરમિયાન, ડૉક્ટરોએ તેમના વિવિધ તબીબી પરીક્ષણો કર્યા અને તેમને દેખરેખ હેઠળ રાખ્યા હતા. હૉસ્પિટલ પ્રશાસનના જણાવ્યા અનુસાર, હૉસ્પિટલમાં દાખલ રહ્યા તે દરમિયાન તેમની તબિયત સ્થિર રહી હતી અને તેઓ સારું અનુભવી રહ્યા હતા. રૂબી હૉલ ક્લિનિકના ચીફ કાર્ડિયોલોજિસ્ટ, ચૅરમૅન અને મૅનેજિંગ ટ્રસ્ટી ડૉ. પરવેઝ કે. ગ્રાન્ટે જણાવ્યું હતું કે, શરદ પવારને નિયમિત સ્વાસ્થ્ય તપાસ અને તબીબી દેખરેખ માટે દાખલ કરવામાં આવ્યા હતા. તેમણે છાતીમાં દુખાવાની (પ્લ્યુરિટિક પેઇન) ફરિયાદ કરી હતી. તબીબી તપાસ અને દેખરેખ બાદ, બુધવારે શરદ પવારને હૉસ્પિટલમાંથી રજા આપવામાં આવી હતી. હૉસ્પિટલમાંથી રજા મળ્યા બાદ, તેઓ મુંબઈ સ્થિત તેમના નિવાસસ્થાને જવા રવાના થાય તેવી અપેક્ષા હતી.
