08 July, 2026 01:31 PM IST | Jammu and kashmir | Gujarati Mid-day Online Correspondent
પ્રતીકાત્મક તસવીર
જમ્મુ-કાશ્મીરના શોપિયાં જિલ્લામાં સુરક્ષાદળોને મોટી અને રાહત આપનારી સફળતા મળી છે. છેલ્લા ચાર દિવસથી ચાલી રહેલી ભારે અથડામણ (એન્કાઉન્ટર) બાદ બુધવારે પ્રતિબંધિત આતંકી સંગઠન લશ્કર-એ-તૈયબાના (LeT) ટોપ કમાન્ડર જાકિર ગનાઈનો મૃતદેહ મળી આવ્યો છે. મૃતદેહ પાસેથી મોટી માત્રામાં આધુનિક હથિયારો અને દારૂગોળો પણ જપ્ત કરવામાં આવ્યો છે. આ સફળતા બાદ પણ સુરક્ષા એજન્સીઓએ સમગ્ર વિસ્તારમાં સર્ચ ઓપરેશન ચાલુ રાખ્યું છે.
સુરક્ષા અધિકારીઓ પાસેથી મળેલી માહિતી મુજબ, આ સમગ્ર ઓપરેશનની (shopian encounter) શરૂઆત શનિવારે થઈ હતી. શોપિયાંના મીમંદર વિસ્તારમાં લગાવવામાં આવેલા સર્વેલન્સ કેમેરા (CCTV)માં બે શંકાસ્પદ આતંકવાદીઓની હિલચાલ જોવા મળી હતી. આતંકવાદીઓની ઓળખ થયા બાદ ભારતીય સેના, જમ્મુ-કાશ્મીર પોલીસ અને કેન્દ્રીય રિઝર્વ પોલીસ ફોર્સ (CRPF)ની સંયુક્ત ટીમે સમગ્ર વિસ્તારને ઘેરી લીધો હતો. સુરક્ષાદળોનો ઘેરો કડક થતો જોઈને બગીચામાં છુપાયેલા આતંકવાદીઓએ સેનાની ટીમ પર અંધાધૂંધ ગોળીબાર શરૂ કરી દીધો હતો. ત્યારબાદ સુરક્ષાદળોએ પણ જવાબી કાર્યવાહી કરી હતી અને બંને તરફથી અથડામણ શરૂ થઈ હતી.
ઓપરેશનના (shopian encounter) બીજા દિવસે એટલે કે રવિવારે સુરક્ષાદળોએ રણનીતિ હેઠળ આખી રાત વિસ્તારમાં રોકાયા બાદ ઘનઘોર સફરજનના જંગલમાં છુપાયેલા લશ્કરના બંને આતંકીઓ સામે ફરીથી ચારેય તરફથી કાર્યવાહી શરૂ કરી હતી. તપાસમાં સામે આવ્યું કે ફસાયેલા બંને આતંકીઓની ઓળખ જાકિર ગનાઈ અને લતીફ તરીકે થઈ હતી. બંને દક્ષિણ કાશ્મીરના કુલગામ જિલ્લાના રહેવાસી હતા. સૈન્ય રેકોર્ડ મુજબ, કમાન્ડર જાકિર વર્ષ 2024થી જ ખીણ વિસ્તારમાં લશ્કર-એ-તૈયબાના નેટવર્કને સંભાળી રહ્યો હતો. જ્યારે તેનો સાથી લતીફ ગયા વર્ષે જ આ પ્રતિબંધિત સંગઠનમાં જોડાયો હતો. બંને આતંકીઓ ખીણ વિસ્તારમાં કોઈ મોટા ષડયંત્રને અંજામ આપવાની તૈયારીમાં હતા.
સતત ચાર દિવસ સુધી ચાલેલા આ મુશ્કેલ અને સંવેદનશીલ ઓપરેશન (shopian encounter) બાદ બુધવારે શોપિયાંના ચાનપોરા ગામ નજીકથી લશ્કર કમાન્ડર જાકિર ગનાઈનો મૃતદેહ મળી આવ્યો હતો. સુરક્ષા દળોએ હવે સત્તાવાર રીતે પુષ્ટિ કરી છે કે શોપિયાં એન્કાઉન્ટરમાં માર્યો ગયેલો આતંકી લશ્કરનો ટોપ કમાન્ડર જાકિર જ હતો. એન્કાઉન્ટર સ્થળ અને તેની આસપાસના રસ્તાઓ પર હજુ પણ સુરક્ષા દળોનો કડક પહેરો છે. ગુપ્તચર માહિતીના આધારે સુરક્ષા એજન્સીઓ એ પણ તપાસ કરી રહી છે કે વિસ્તારમાં તેના કોઈ અન્ય સાથીદારો અથવા છુપાયેલા ઠેકાણા તો નથી. સુરક્ષા દળો સમગ્ર વિસ્તારમાં હજુ પણ સતર્કતા સાથે તપાસ અભિયાન ચલાવી રહ્યા છે.
શોપિયાં એન્કાઉન્ટરમાં (shopian encounter) લશ્કર-એ-તૈયબાના કમાન્ડર જાકિર ગનાઈના મોત બાદ પણ સુરક્ષા દળોએ વિસ્તારની સુરક્ષા વધુ કડક બનાવી છે. એજન્સીઓ હવે એ તપાસ કરી રહી છે કે આતંકી સંગઠનના અન્ય કોઈ સાથીદારો અથવા છુપાયેલા નેટવર્ક સાથે તેનો સંપર્ક હતો કે નહીં. સુરક્ષા દળો માટે આ ઓપરેશન મોટી સફળતા માનવામાં આવી રહ્યું છે, પરંતુ ખીણ વિસ્તારમાં શાંતિ અને સુરક્ષા જાળવવા માટે તપાસ અને સર્ચ ઓપરેશન હજુ પણ ચાલુ રહેશે.
