ઘોડીએ ચડેલા વરરાજાની જાન રોકાવીને કર્મચારીએ SIRનું ફૉર્મ ભરાવ્યું

દુલ્હાએ પણ ફટાફટ ફૉર્મ ભરી આપ્યું અને પછી શાનથી જાન લઈને નીકળી ગયો

આ ઘટનાની તસવીરો લઈને ગામના મુખિયાએ સોશ્યલ મીડિયા પર શૅર કરી હતી

હાલમાં ઉત્તર પ્રદેશમાં પણ સ્પેશ્યલ ઇન્ટેન્સિવ રિવિઝન (SIR)ની પ્રક્રિયા જોરશોરથી ચાલી રહી છે. અહીં બૂથ લેવલ ઑફિસરો (BLO)એ ઘરે-ઘરે જઈને લોકોનાં નામ અને ઍડ્રેસ વેરિફાય કરવાનું શરૂ કરી દીધું છે. ગુરુવારે સવારે વારાણસી જિલ્લાના એક ગામમાંથી દુલ્હો ઘોડીએ ચડી જાન લઈને અજિતપુરા જવા નીકળ્યો ત્યારે જ BLO ત્યાં આવી પહોંચ્યા હતા. DJની ધામધૂમ ચાલી રહી હતી અને લોકો નાચવામાં મશગૂલ હતા. જો જાન નીકળી જાત તો બે દિવસ સુધી તેમના પરિવારના વોટર્સનું વેરિફિકેશન ટળી જાત. એટલે BLO સાથે ગામના મુખિયા મોહમ્મદ આરિફ હુસેન અન્સારી દુલ્હાના ઘરે પહોંચી ગયા અને જાન લઈની નીકળતાં પહેલાં જ SIRનાં ફૉર્મ ભરાવી લીધાં. દુલ્હાએ પણ ફટાફટ ફૉર્મ ભરી આપ્યું અને પછી શાનથી જાન લઈને નીકળી ગયો. આ ઘટનાની તસવીરો લઈને ગામના મુખિયાએ સોશ્યલ મીડિયા પર શૅર કરી હતી.